LIZTOR asiarraren kontrako borrokan beste urrats bat egin du Hernaniko Udalak. Aparailu berria erosi du eta dagoeneko oso erabilterraza eta eraginkorra dela egiaztatu du. Paintballean erabili ohi den pistola bat da. Barruan biozida duten gelatinazko bolatxoak jaurtitzen ditu, 40 metroko distantzia batetik jaurtitzeko gaitasuna du eta pertsona bakar batek erabili dezake. Aparailuak sortu duen ikusmina ikusita, Hernaniko Udala Gipuzkoako beste udalerrietan erakustaldiak egiten ari da.
Liztor asiarra edo liztor beltzari (Vespa velutina) aurre egiteko, Udalak baliabide propioak erabiltzen ditu liztor beltzaren ugaltzeari mugak jartzeko. Udal langileak, Babes Zibila, Udaltzaingoa eta Herrilanak aritzen dira, erlezainekin eta herritar bolondresekin batera, habiak identifikatzen eta kentzen eta pozoitzen.
Erabiltzen da kabia oso altu dagoenean
Orain arte bi modu erabili ohi dira horretarako: 5 metro baino beherago dauden habiak pozoitzeko aluminiozko eta karbono zuntzezko pertigak (habien barruan biozida sartzeko); 5 metrotik gorakoak, sistema berarekin, baina garabiatik, eta, oso altu daudenak eta aukera ematen ez dutenak garabia sartzeko tirokatzen dituzte. Horrelako gehienak landalurretan azaltzen dira, baino herri barruan ere azaldu da batenbat.
Nolanahi ere, Hernaniko Udala etengabe aritu da beste lekuetan egiten denaren informazioa lortzen eta lortzen duen informazioa beste erakunde eta herrietako kabi inaktibatzaileekin konpartitzen.
Herriko erlezainen bidez izan zuen Hernaniko Udalak Dipter enpresa frantziarrak egiten zuen aparailuaren berri. Horrek izan zezakeen poten–tziala ikusita, erosi zuen eta jadanik zazpi kabi arrakastaz pozoitu dituzte udal langileek.
Paintballeko pistola bat da. Barruan biozida duten gelatinazko bolatxoak jaurtitzen ditu. Biozida horren eragina bi egunekoa da eta, ondorioz, kabia kentzea baino eragingarriagoa da; tirokatu bitartean alde egiten duten liztorrak edo janaria biltzen kanpoan daudenak, kabira bueltatzen direnean, kutsatu eta hil egiten baitira.
Pistola horrek 40 metroko irismena dauka. Distantzia horretara iritsi ahal izateko aire konprimitua edo CO2 behar du. Udalak erosi duen pistola aire konprimituko 0,8 litroko bi botilekin dator. Botila horiek betetzeko presio handiko konpresorea ere beharrezkoa da (200 baretik gora).