Latsunbeberri eta Marielutseko festak egun bateko jaiak ziren orain hamabi urte, baina denborarekin hazten joan dira eta horren arrazoi nagusienetakoa gaur antolatzen den paellada izaten da. Arrakasta itzela izaten du eta 150 pertsona edo gehiago biltzen dira mahaiaren inguruan. Urbieta kaleko balioaskotarako pistan biltzen dira bizilagunak eta denentzako paellada antolatzea ez da erraza.
Horretarako auzotarren lana beharrezkoa da eta sukaldari lanetan aritzen da ‘Txiki’. «Clari, Anjel Pina, Txelo, Izaskun, Tomás... Iturritxo elkarteko kideak aritzen gara paellada prestatzen». Horrenbeste bizilagunentzako prestatzeak bere zailtasunak ditu Txikiren hitzetan eta esperientzia behar izaten da. «Ni izaten naiz koordinatzailea edo arduradun nagusia».
Eta paelladak ez du berarentzako sekreturik. «Ez da erraza izaten. Haragiarekin egindako paella izaten da. Kontuan hartu behar dira generoa eta adi egon dena ongi dagoen edo ez. Azkenean lau orduko lana da. Dantzari festarentzako eta beste ekitaldi batzuentzako egin izan ditut paellada erraldoiak, baina ez hainbeste jenderentzako. Esperientzia banuen 50-80 pertsonentzako paellak egiten».
Latsunbeko festen ezaugarri nagusienetakoa dira egiten diren bazkari eta afariak. Orain bost urte inguru hasi ziren paelladarekin eta arrakasta berehalakoa izan zen. «Festen hazkundearen parte dira. Pixkana pixkana egitaraua zabaltzen joan ginen eta paelladaren ideiarekin bete betean asmatu genuen. 150-200 pertsona izaten ditugu urtetik urtera eta lortu dugu eguerdiko ekintzen eta arratsaldeko ekintzen arteko hutsunea betetzea. Festak indarra lortu du».
Umeen inguruan sortu ziren festa hauek Iturritxo Elkarteko partaideen esanetan. «Egitaraua beraiei zuzendua zegoen, baina gurasoak konturatu ginen guretzako ere gauzak egin zitezkeela, denentzako festak eginez. Horrela sortu ziren beste hainbat ekintza; sardinada, paellada, tortilla lehiaketa, sagardo dastaketa, mus txapelketa..».
«Umeen inguruan sortu ziren festak, baina adin guztietara zabaldu dira urteen poderioz»
Sardinadan ere jendetza biltzen da
Paellada ez da izaten janariaren inguruan egiten den jate bakarra. festen lehen egunean sardinada ere antolatzen da. Atzo izan zen eta Txiki eta bere lagun Pepelu egoten dira sukaldari lanetan. «Askoz ere errazagoa izaten da. Osagai bakarra da eta ez du horrenbesteko lanik eskatzen. Birekin moldatzen gara sukaldean. Pepelu eta ni».
Bihar tortilla patata lehiaketa ere antolatzen da. «Hor guk ez dugu sukaldari lanik egiten eta sagardo dastaketaren bueltan sortu zen ideia da. Sagardoaz dastatzeko produktu bezala erabiltzen dugu tortilla».
Festetan eta mahai inguruan sortzen den giroa ezin hobea da eta Iturritxo Elkartetik dei egiten die bizilagunei eta herritarrei festan partehartzeko.
«Jendea animatu nahi dugu etortzeko. Paelladarako tiketak saltzen dira eta gutxi gorabehera badakigu zenbat jendearentzako prestatu behar dugun. Hala ere generoa amaitzen baldin bada erosi ditzazkegu osagai gehiago. Beraz lasai, inor ez da geratuko bazkaldu gabe».
«Jende berria sartzea eskertuko genuke»
Txiki, Tomas de Diego eta Iturritxo Elkarteko beste kide denek lan haundia egiten dute festak ahalik eta onenak izateko.
«Nekea nabaritzen da, baina hiru egun politak izaten dira eta gustora egiten dugu. Hala ere eskertuko genuke jende berria etortzen baldin bada elkartera festak eta ekintza desberdinak laguntzeko». Eguraldia lagun izatea espero dute.