Iritsi da eguna! San Joan bezperarekin lehertuko da, azkenean, aurreko egunetan pil-pilean dabilen festarako gogoa! Eguerdiko 12:00etan txupinazoa bota aurreko momentuetan, kolorez eta ilusioz betetako Plaza bat ikusiko dute San Joan Konpartsako kideek. Eta behin suziria zeruan lehertzen denean, salto eta kanta artean murgilduko dira herritarrak; datorren asteartera bitarte atsedenik izango ez duen festa batean!
Haurren marrazki lehiaketa, tiro txapelketa, Azeri Dantza edota aurreskua izango dira protagonista aurrena, eta Akelarreak hartuko du Plaza gero, herriko abesbatzek kalez kale kantatzen duten bitartean. Elizako Salbe Nagusiak eta Musika Bandaren San Joan martxak egingo diote bidea, Plaza jendez beteko duen San Joan suari.
Eta sugarrak bezala zabalduko da musika, gauean ere: DJ gaua Molotoffen eszenatokian, gau elektronikoa Milagrosan, Laiotzekin dantzaldia Tilosetan, Santa Barbara elkartearen danborrada, eta Urumea txarangaren kalejira.
«Jaiak askatasunean baina sano gozatzeko» deia, Udal Gobernuak
Eta festak hastear direnean, Udal Gobernu Taldeak gogorarazi nahi izan du, «disfrutatzeko» direla, «askatasunean baina sano, eta besteekiko eta inguruarekiko errespetua ipar hartuta».
Horretarako, nabarmendu dute Jai Batzordea saiatu dela «hernaniar guztiontzat eskaintza zabala» daukan egitaraua osatzen, «adin eta gustu guztiak kontuan hartuz, denok goza dezagun herriko jaietan».
Aurreratu dute, «zenbait moldaketa» dituela programak, Jai Batzordeak egin duen gogoetaren ondorioz: «jaietan animaliei ematen zaien tratuaren inguruko hausnarketagatik, ekintza batzuk kendu egin ditugu egitarautik, eta beste batzuen maiztasuna gutxitu», azaldu dute.
Zentzu horretan, Udalak eskerrak eman nahi izan dizkie, San Joanak antolatzen eta aurrera ateratzen parte hartu eta lan egin duten guztiei.
Eta azkenik, ez dituzte ahaztu nahi izan, «San Joanak gurekin gozatzeko aukerarik izango ez duten lagun, koadrilakide eta familiartekoak».
Hondakin bilketa zerbitzuan aldaketak, jaiek iraun bitartean
Bestalde, Udalak jakinarazi du, hondakin bilketa zerbitzuan aldaketak izango direla, jaiek iraun bitartean, kale hauetako bizilagun eta komertzioei eragingo dietenak: Andre kalea, Atzieta, Biteri 2, Tiloseta, Gudarien Plaza, Iturriaga, Izpizua, Nafar kalea, Kale Nagusia, Plaza Berri, Urbieta kalea (6, 7, 8, 9, 10 eta 12 zenbakiak) eta Zapa.
Eguerdiko 12:30etatik 14:00etara atera beharko dituzte hondakinak, egun bakoitzean hauek: gaur eta igandean organikoa, astelehenean errefusa eta ontzi arinak, eta asteartean papera eta kartoia.
Komertzio eta tabernei, hiru bilketa berezi ere egingo zaizkie: kartoia gaur, errefusa bihar, eta ontzi arinak etzi.