Badirudi langabezia tasa behera egiten ari dela Hernanin, 2014az geroztik. Aurten, martxoan 1.061 langabetu erregistratu dira Hernanin; horietatik, 582 emakumeak, eta 479 gizonak. Iaz, martxoan baita ere, 1.225 ziren langabetuak Hernanin; 2015ean, 1.325; eta 2014an, 1.431.
Kopuruak behera egin arren, ordea, gaurko egunean, Langileen Nazioarteko Egunean, mobilizaziorako deia egin dute hainbat eragilek; Hernanin, Ernaik eta LABek. Azken honek autobusa atera du, Bilbon egingo den manifestaziora joateko, «langileen egoera prekarioa salatzeko».
Emakume gehiago, lanik gabe
Datuen arabera, gehiago dira lanik gabe dauden emakumeak, gizonak baino. 2016a ixtean (abenduan), 585 emakume langabetu zeuden Hernanin, eta 493 gizon; 2015ean, 601 emakume eta 574 gizon; eta 2014an, 665 emakume eta 647 gizon.
Urte bakoitzeko joerari erreparatuta, berriz, urte hasieran, martxoan izaten da langabezia tasa altuena; ekainerako jaitsi egiten da; irailerako zertxobait igo; eta abendurako jaitsi, baina hurrengo martxorako igo. Aurten, aurrenekoz, aurreko urtea ixtean baino langabetu gutxiago izan dira, martxoan.
Sektoreei dagokienez, zerbitzuetan dago oraindik langabetu gehien; industrian, eraikuntzan eta nekazaritzan, gero.