Hernaniko Karabel inguran naturagune berezi bat dago. Dozena bat pertsona aritzen dira egunero Karabeleko ekonekazaritza etxaldean lanean, barazkigintza ekologikoa eta agroekologian oinarritutako gizarte-eredua sustatzeko helburuarekin. Kimu Bat paisajismo enpresak, Blasenea hazitegiak eta Agifes elkarteak bultzatutako proiektu hau handitzen doa pixkana, 2014. urtean jaio zenetik.
Azken hamarkadetan galdutako biodibertsitatea berreskuratzeko eta euskal baratzeetan landatzen den barazki barietatea zabaltzeko ikerketa eta entsegu lanetan dihardute bertan. Izan ere, Karabeleko ekimen aurrendaria da kantauriar isurialdean, nekazaritza ekologikoa ardatz duen esperimentazio lana burutzen duen beste gunerik ez baitago. Bertan, ahaztutako nahiz kanpotik ekarritako hazi ekologikoen hazkuntza aztertzen dute, gure klimara hoberen egokitzen direnak eta organoleptikoki interesgarrienak lantzeko eta horien inguruko ezagutzak baratzezainei helarazteko.
Zabor organikoen kudeaketa jasangarrirako proiektua ere landu dute Karabelekon, eta intsektuen bioaniztasuna zaintzeko hezegunea sortu berri dute etxaldean, Aranzadiren gidaritzapean, besteak beste.
Landare eta animaliekin batera, pertsonak dira proiektuaren erdigune. Izan ere, baztertze arriskuan dauden kolektiboen errehabilitazio psikosozialerako zentro ere bada Karabeleko. Buruko osasun arazoak dituzten 40 bat lagun inguruk burutzen dute bertan, Agifes elkartearen eskutik, euren jarduera terapeutikoa, naturarekin harreman estuan; eta Martuteneko espetxeko hainbat kidek ere baratzezaintzarako trebakuntza jasotzen dute etxaldean.
Landareen erritmoan hazten doan proiektu honen dimentsio anitzak ezagutu nahi dituztenek aukera dute Karabeleko etxaldera gerturatzeko. Izan ere, gizarte-sentsibilizazioa helburu izanik, ikastetxe eta zentro ugaritako bisitari taldeak jasotzen dituzte urtero.
Horiez gain, Hernaniko hainbat proiekturekin ere elkarlanean aritzen dira, adibidez, Lurreko eta Diametro 200 jatetxea.
ELKARRIZKETA // Ixiar Iraola
«Karabelekok lagundu dit segurtasuna eta erantzukizuna izaten, baita lan ohituretan ere»
Karabeleko etxaldean egiten du lan Ixiar Iraola hernaniarrak: «oso atsegina da baratzan lana egitea».
Agifesekin, Buru Gaixotasuna duten Pertsonen eta Senideen Gipuzkoako Elkartearekin elkarlanean, Karabeleko etxaldean lanean ari den boluntarioetako bat da Ixiar Iraola hernaniarra. Duela hiruzpalau urte hasi zen bertan lanean, eta esperientzia gogorra bezain atsegina dela onartu du.
Karabelekok ateak ireki zituenetik zaude hemen. Zein onura ekarri dizkizu?
Hasieran oso gogorra izan zen, izan ere, martxan jartzea izugarri kostatzen zitzaidan, baina gutxinaka lantzen zoaz gero eta gehiago. Azkenean, oso atsegina da baratzan lana egitea.
Nolatan animatu zinen Karabelekon lan egitera?
Asteazken eta ostiraletan AGIFESen zentrora joaten naiz buru gaixotasuna duten pertsonenentzat ekintzak egiten dituzten lekura, eta bertan esan zidaten Karabelekorekin elkarlana sinatu zutela. Orduan, zalantzarik egin gabe, eman nuen izena hasieratik.
Eta bertara iritsi aurretik, harremanik izan al zenuen baratzarekin?
Bai, nire amona eta aita baratza edukitakoak dira. Orain, ordea, bertako barazki ekologikoak hartzen ditugu.
Terapiaren aldetik, zertan lagundu dizu Karabelekon lan egiteak?
Lagundu dit segurtasuna eta erantzukizuna izaten, baita lan ohituretan ere. Gainera, ikasten zoazen bitartean lana ere egiten duzu. Horrez gain, egunerokotasunean ere, laguntzen dit: hemen bazkaltzen geratzeak, gure kabuz prestatzeak... azkenean, hori guztia partekatzea positiboa da trebetasun sozialetarako.
Zer gehiago ikasi nahiko zenuke?
Gustatuko litzaidake baratzaren inguruan gehiago sakontzea, batez ere, alderdi praktikoan: zein garaietan landatzen den zer, landare desberdinen izenak, zenbat denbora behar duten hazteko...
Nola irudikatzen duzu Karabeleko etorkizun hurbilean?
Zaila da irudikatzea, epe laburrean hainbeste aldatzen ari da...!
Ekodenda eta kontsumo taldea
Karabelekoren baratzeetako uzta dastatu nahi duten herritarrak ongi etorriak dira Portu Auzoan kokatuta dagoen etxaldera. Bertako ekodendan barazkiak, haziak, landareak, garaiko loreak, baratzerako ongarri eta erremintak, eta gertuko ekoizle ekologikoen jakiak daude eskuragarri.
Etxaldean bertan ekoitzitako barazkiekin egiten diren otarren kontsumo taldea ere badute, 120 lagun ingururekin. Astero saski bana jasotzen dute partaideek Karabelekon bertan edo Hernaniko Lurreko dendan. Donostian ere badaude hainbat bilketa-gune. Bi otar mota daude aukeran, produktu kantitateen arabera: oinarrizkoa bi pertsonarentzat pentsatua dago eta familiarra, berriz, lauzpabost kiderentzat.
Ordutegia
Astelehenetik ostiralera 09:00etatik 19:30etara
Larunbatetan 10:00-13:00etara
Harremanetarako informazioa
Portu Auzoa, 34. Hernani.
943 55 75 24
info@karabeleko.org