Ezohiko Plenoa egin zuten atzo, Hernaniko Udalean, puntu bakarra lantzeko, aurreko astean bertan behera geratu zen mozio bat. Altsasuko gertaeren bueltan aurkeztu zuen adierazpena EH Bilduk, eta aho batez onartu zuten atzo, Plenoan ordezkatuta zeuden hiru alderdiek: EH Bilduk, EAJk eta Orain Hernanik; PSE-EE ez zen azaldu osoko bilerara.
Adierazpenean, elkartasuna helarazi nahi die Hernaniko Udalbatzak, Altsasuko herritarrei, atxilotuei, espetxeratuei, eta haien senide eta lagunei. Eta eskatzen du, «neurrien desproportzioa dela eta, espetxeratuak lehenbailehen askatzea, eta haien kontrako terrorismo akusazioak ezabatzea». Eskatzen du, baita ere, kasua Iruñako epaitegira bueltatzea, «bertan hasi zelako, eta bertan dagoelako kasua hasi zuen polizia foralaren lehen txostena». Eta uste du, gatazkaren konponbidean, «desmilitarizazioaren eztabaida ere normaltasunez» eman behar dela, eta bide horretan pausoak eman.
Akusazioak, espetxeraketak eta oihartzun mediatikoa, «desproportzionatuak»
Altsasutik iristen diren berriekin kezkatuta azaldu da Plenoa, eta adierazi du, «erabat desproportzionatuak» iruditzen zaizkiola, «akusazioaren larritasuna, atxiloketak, espetxeratzeak, eta kasuak izan duen oihartzun mediatiko eta soziala». Eta oso haserre azaldu da, Altsasuko herriak eta bere herritarrek jasan dituzten akusazio, manipulazio eta irainekin.
«Gure ustez, horrek guztiak helburu jakin batzuk ditu: batetik, Altsasuko herria, herriko gazteak eta herri mugimendua kriminalizatu eta desaktibatzea; eta bestetik, desmilitarizazioaren eztabaida ezeztea», diote adierazpenean: «ETAk behin betiko su etena eman eta bost urtera, Europan polizia dentsitate haundieneko herrialde bat da gurea».