Gaur emango diote hasiera, beste ikasturte batez, Txistulariak arkupeetan zikloari. Kurtsoko aurreneko kontzertua eskainiko dute, Hernani musika eskolako txistulariek; udaletxeko arkupeetan, eguerdiko 12:30etan hasita.
Errepertorioko doinuak eta euskal kantu ezagunak
Egitarau zabala prestatu dute, ikasturtearen estreinako emanaldirako. Tartekatuko dituzte txistularien errepertorioko doinuak eta euskal kantu ezagunak, «neguko atarian hotzak astindu eta alaitasun apur bat ekartzeko asmoz», aurreratu dute txistulariek.
Beraz, zortzikoa, kontrapasa, dantzak eta horrelakoak joko dituzte; baina baita Iribaseko ingurutxoa, Amnistiaren kantua edota Haurrak kantari bezalakoak ere.
‘Musikalean’ bihar, eta Santa Zeziliakoa etzi
Bihar, berriz, Musikalean eskaintzera aterako dira kalera, Hernani musika eskolako ikasleak, arratsaldeko 17:30etan.
Eta etzi, urteroko bi zita jarri dituzte, Santa Zezilia eguna ospatzeko. 18:30etan hasita Biterin, kontzertua eskainiko dute aurrena, eta diplomak banatuko dizkiete ondoren.
Eta datorren ostiralean ere, badaukate emanaldi bat aurreikusita, musika eskolako ikasleek. Akordeoi entzunaldia eskainiko dute, arratsaldeko 17:30etan hasita, Milagrosako kaperan.