Greba hasi zuten astelehenean Gipuzkoa, Bizkaia eta Arabako garbiketa alorreko langileek; hain zuzen, Euskal Herriko Unibertsitatean (EHU-UPV) eta Eusko Jaurlaritzako hezkuntza sarean azpikontratatuta dauden garbitzaileek. 2014ko abendutik hona ez dute lan hitzarmena berritu, eta hiru eskari nagusi dituzte langileek: 2010az geroztik izoztutako soldatak igotzea, kontratu motak hobetzea eta lan erreformaren aurrean bermeak jasotzea.
Hasiera batean, ostiralera arte luzatuko dute greba, eta dagoeneko, eragina nabari da Hernaniko hainbat udal eraikinetan.
Eskoletan, zerbitzu minimoak
Hernaniko hainbat udal eraikinetan eragin zuzena dauka grebak. Udalak jakinarazi duenaren arabera, «Eusko Jaurlaritzak gutxieneko zerbitzuak ezarri ditu ikastetxeetan (0-12 urte) eta osasun zentroetan». Baina hainbat udal eraikinetan «ez dago garbiketa zerbitzurik»; hala nola, «udaletxean, Biteri kultur etxean, udal musika eskolan, Gabriel Zelaian eta kiroldegian».
Hori horrela, eraikin horiek irekita mantenduko ditu Udalak «erabiltzaileen osasuna berma daitekeen bitartean», baina batzuk itxi egin daitezkeela dio, «arriskua ikusten denean». Komun publiko batzuk, adibidez, itxita daude.