Zarataren Mapa aurkeztu berri die EH Bilduko Udal Taldeak beste gainontzeko udal ordezkariei. Aurkezpenaren ondoren, PSE-EEk balorazioa egin nahi izan du gaiaren inguruan. Prentsa-ohar bitartez bere harridura agertu du, izan ere, bere ustez, «Zarataren Mapak ez du Hernaniko errealitatea islatzen». Eta jarraian, kritikatu du «Kaxkoko zaratari aurre egiteko Udalaren inplikazio eza».
«Ikuspuntu orokorra»
Ricardo Crespo PSE-EEko Udal bozeramailearen hitzetan, «Udalak aurkeztutako Zarataren Mapako disgnostikoa ez da nahikoa, eta herriak dituen arazoen ikuspuntu orokorra besterik ez du ematen».
Prentsa-oharrean adierazten dute Zarataren Mapa Udal Talde sozialistak behin eta berriro eskatu duten trena dela, horren inguruan, estrategiak definitu, neurriak hartu eta elkarbizitzan sortzen dituen arazoak konpontzeko. Horregatik Crespok onartu duenez, «gehiago espero genuen».
Horrez gain, salatu dute, «urtebeteko atzerapenarekin» aurkeztu dela.
«Herriak dituen arazoen ikuspuntu orokorra besterik ez du ematen»
Dirulaguntzak, lehioak aldatzeko
PSE-EEk jakinarazi du Zarataren Mapak bereziki ez duela islatzen «zaratak gehien erasotzen duen auzoaren errealitatea, gaueko aisialdiak Kaxkoan eragiten duena». Bizilagunen Elkarteak eta bizilagunen kejak eta salaketek agerian uzten dute, beraien ustez, «arazo larria» dutela.
Horren aurrean, Crespok eskatu dio Udal Gobernuari «gaiari lehenbailehen heldu eta zaratari aurre egiteko; gaueko aisialdiak, bereziki Txotx denboraldian zehar, Hernaniko puntu honetan duen inpaktu akustikoa aztertuz. Eta neurriak hartu ditzala arazoak gutxitzeko».
EH Bilduri eskatu dio, baita ere, «dirulaguntzak plazaratzeko bizilagunek kristal bikoitzeko lehioak jarri ditzaten».