CD Hernanik eta Xalaparta txarangak bota zuten atzo San Joan jaiei hasiera eman zien txupinazoa. Plaza jendez bete, itzalpean itxoin zuten herritarrek hasieran, baina berehala animatu ziren eguzkiaren eta festaren epelera. CD Hernaniko lehendakariak, Martxelo Ezpondak, eta Xalaparta txarangako ordezkariek, Joxean eta Mikel Ruizek agurtu zituzten herritarrak, eta oihukatu: «Gora CD Hernani! Gora Xalaparta! Eta gora Hernani!». Segidan, Amaia Irazustabarrenak lagundu zien ikurrina eta bandera altxatzen, eta bi taldeetako hainbat kidek karameluak oparitu zizkieten Plaza betetzen zuten herritarrei. Udaletxeko balkoian egoteko zortea izan duten herritarrek ere lagunak agurtzen zituzten, eta azkenean, Plazan egin zuten denek bat, buruhaundi eta erraldoiekin dantzan, Musika Eskolako ikasleen doinuen erritmora.