Hernaniko Txistulari Banda eta Musika Banda arduratuko dira gaur, musikari protagonismoa emateaz, goiz osoan zehar. Egunari hasiera emateko, diana joko dute elkarrekin, 09:00etan abiatuta, Mendirik Mendi doinuaren airera.
Txistulari Banda aurrena, zortzi piezarekin
Eta behin herria esnatuta, saio berezia eskainiko dute bi bandek, Plazan. Kontzertu bana emango dute, udaletxeko arkupeetan.
Txistulari Banda izango da aurrenekoa, 12:00etatik aurrera. Zortzi pieza joko dituzte, Patxi Apezetxearen zuzendaritzapean, eta inguruko txistulariek, Metal boskoteak eta Unai Agirre bertsolariak lagunduta: Zortziko-Biribilketa, Lantzeko ihauteria, Habanera, Kontrapasa, Desde Santurce a Bilbao, Comparsa de Caballería de gallos, Ama begira zazu, eta San Joan zortzikoa.
Hiru kideri omenaldia, Musika Bandak
Ondoren eskainiko du bere kontzertua Musika Bandak, 13:15etan. Eta aprobetxatuko dute, bandako hiru kideri omenaldia egiteko, 25 urte daramazkitenak: Laura Pacheco, Asier Baro eta Asier Lizartza.
Roberto Pachecok zuzenduta, bost piezako saioa eskainiko dute: San Roque, Los anillos de Saturno, Pesares, La máscara del zorro, eta A Igarondo.