Apirilaren 21ean, osteguna, mobilizatzeko deia egin du Denak ala inor ez gazte dinamikak. «Gazteok lehen lerroan egon behar dugu euskal preso eta iheslari politikoen etxeratzeko borrokan».
Plazatik abiatuko dira, arratsaldeko 19:00etan. Dagoeneko, atxikimendua adierazi diote mobilizazioari, Bilgune Feminista, Ernai, Etxerat, Ikasle Abertzaleak, LAB, Sortu, Liletak, Sutu Hernani eta Urrunegik.
Hernanin, bi kasu
Egun, «390 euskal preso politiko Espainiako zein Frantziako 72 espetxetan sakabanatuta» daudela azaldu dute. «Hori gutxi balitz, 11 euskal preso politikok gaixotasun larria pairatzen dute, eta beste hiru, espetxe arinduan sufritzen ari dira». Horietako bi kasu daude Hernanin. «Garikoitz Arruarte Santa Cruzek espondilitis ankilopoietikoa dauka, eta 2003tik dago preso». Era berean, «Ibon Fernandez Iradi lasartearrak esklerosi anizkoitza du».
Hori horrela, azaldu dute: «Berebizikoa da larriki gaixo dauden preso politikoak askatzea, beraiek baitira espetxe politika ankerra gehien jasaten dutenak».