Emakumeen Nazioarteko Egunaren bueltan hainbat ekimen ari dira izaten herrian. Eta gaur, bi antolatu dituzte; biak, aldarrikapena festa giroan egiteko asmoarekin.
Rap feminista, ‘La Furiaren’ eskutik
Hasteko, iluntzeko 19:30etan La furia taldeak joko du Tilosetan. Donostiako rap abeslariak dio, rap-a egiten duela erraietatik ateratzen zaiolako. Azaldu duenez, barrenak husteaz gain, bere helburu nagusia da emakumeen eskubideak aldarrikatzea. Bere musika rap feminista gisa definitzen du. 2013an No hay clemencia diskoa argitaratu zuen, autoekoiztua; bestalde, beste hainbat bildumatan ere, parte hartutakoa da. Berdintasun Kontseiluak eta Udalak antolatu dute kontzertua.
«Gaztetxea okupazio feminista izatea nahi dugu»
Hernaniko Bilgune Feministak eta Sutu Hernanik berriz, Sagar moreen iraultza festa! antolatu dute gaur Gaztetxean, 22:00etan hasita. Joan den urtean kalera atera ziren, beldurrari aurre egiten dieten feministak geroz eta gehiago direla adieraziz. Aurten ordea, festa antolatu dute, aldarrikapenez eta edukiz betea egongo dena: «gaztetxea okupazio feminista izatea nahi dugu. Gaur subjektu feministak protagonista izango garen espazioa sortuko dugu gaztetxean». DJ MapH, dantza, ligoteOa, giro feminista, gune askea eta sorpresak izango dira.