Denboraldia espero baino makalago hasi du Hernanik. Hasierako partiduetan lekua hartzea kostatu zitzaion; eta azken partiduetan, jokoa nabarmen hobetu badute ere, garaipenak ihes egin die. Bolada horri bukaera eman nahi dio Hernanik, eta horretarako partidu aproposa da gaurkoa. Oiartzunen kontra neurtuko ditu indarrak; derbia izango da beraz, gaurko neurketa. Eta jokoan, aurrekoetan baino gehiago izango dute: arerio zuzenak dira bi taldeak, atzeko postuetatik ihes egin nahi dutenak. Oiartzun azkenaurreko postuan dijoa 11 punturekin; eta Hernani bat gorago, puntu bat gehiagorekin. Partidua Zubipen, 18:00etan.
Herritarren babesa, behar beharrezkoa
Andoni Loranek Kronikari aitortu dion moduan, Hernanik herritarren babesa sentitzea klabea izango da gaurko partiduan: «etxean jokatzen dugu, eta motibatuta gaude. Derbia delako, eta asko egon daitekeelako jokoan. Horri herritarren babesa gehitzen badiogu, Hernanik pausu garrantzitsua eman dezake gaur. Garaipenarekin, Hernanik Oiartzunekin duen aldea haundituko luke; eta bolada honekin haustea ere ekarriko luke. Honek ere lagunduko luke, denboraldi bukaera bitartean geratzen diren partiduei aurre egiten».
12 partidu, bukatzeko
Denboraldia bukatzeko partidu asko ditu oraindik Hernanik: zehazki, 12. Garaipenaren bideari heltzea izango da helburua, eta pixkanaka-pixkanaka maila mantentzeko pausuak ematea. Hernanik lau denboraldi daramazki, Emakumezkoen Ligan.
Hernani-Ordizia, aurretik
Ohorezko Mailan, Hernanik Ordiziaren kontra jokatuko du gaur. Aurretik izango da partidua: 16:00etan, etxean. Beraz, futbolaz gozatzeko aukera ederra izango du gaur Zubipera gerturatzen denak.