Unai Agirrek irabazi du Eskoriatzan jokatu den Gipuzkoako Bertsolari Txapelketako azken final laurdena, 497,5 punturekin. Hernaniarra zuzenean sailkatu da azaroaren 29an Tolosan jokatuko den finalaurrekorako. Igandean jokatu zen azken saio hau eta Beñat Lizaso geratu zen bigarren (485,5 p). Hirugarren, berriz, Oihana Iguaran (484 p).
Igandeko saioaren ostean, erabakita gelditu da zeintzuk izango diren azaroaren 22tik aurrera finalaurrekoak jokatuko dituzten 18 bertsolariak.
Bertso eskolako lau kide
Finalerdietan ariko diren 18 bertsolarietatik lau, Hernaniko Bertso Eskolakoak dira: Beñat Gaztelumendi, Agin Laburu, Unai Agirre eta Unai Gaztelumendi.
Hiru finalaurreko
Finalerako pasea zeintzuk lortuko duten hiru finalaurrekotan erabakiko da.
Lehenengoa, azaroaren 22an jokatuko da, Zarautzen. Bertan ariko dira Laburu eta U. Gaztelumendi. Gainerakoak: Ander Lizarralde, Alaia Martin, Beñat Iguaran eta Beñat Lizaso.
Bigarrena, azaroaren 29an izango da, Tolosan. Unai Agirrek eta Beñat Gaztelumendik kantatuko dute bertan. Beraiekin ariko dira: Iñaki Apalategi, Nerea Elustondo, Jon Martin eta Oihana Iguaran.
Azken saioa Eibarren izango da, abenduaren 6an. Honakoak ariko dira: Nahikari Gabilondo, Iñaki Gurrutxaga, Felix Zubia, Arkaitz Oiartzabal Xamoa, Jon Maia eta Mikel Artola.
Sarrerak salgai daude www.bertsosarrerak.eus webgunean.