Askotan, oporretan kanpora joan eta etxean dugun altxorraz jabetzen gara. Izan ere, aisialdirako aukera ederra eskaintzen du Urumea bailarak. Bertako herriak mendi, baso, ibai, erreka eta paraje zoragarriz inguratuta daude. Bailara sakon eta malkartsua da, aberastasun haundiko natur ingurunea. Bertan, Aiako Harria Parke Naturalerako edo Artikutzarako sarrerak daude. Landare eta animalia espezie ugari ere bizi da, asko zonalde honetan bakarrik aurkitu daitezkeenak. Hori horrela, aisialdi aktiboarekin erlazionatutako ekintza ugari egiteko aukera dago Astigarraga, Hernani, Ereñotzu, Arano eta Goizuetan: mendi ibilaldiak, bizikleta zeharkaldiak, piraguismoa, eskalada, arrantza, ibaian bainatzeko aukera...
Horrez gain, turismo kulturala ere eskaintzen du bertako herrietako jaiak, monumentuak, industria ondarea, gastronomia, bertsolaritza eta kirola kontuan hartuta. Bertakoentzako eta turistentzako leku ederra beraz, udan ez aspertzeko.
Bisitak, dastaketak eta jolasak, Sagardoetxean
Sagarra eta sagardoaren inguruan landu dute batez ere turismo eskaintza Astigarragan, Sagardoaren Lurraldea proiektuaren bidez (Hernani ere parte da). Sagardoetxea museoa ere Astigarragan da eta hainbat ekintza antolatu dituzte abuztua eta irailerako, ohiko bisita gidatu eta dastaketaz gain:
- Udajolas Sagardoetxean: Aisialdi taldeentzako bisita, joko eta tailer bereziak sagardoaren kultura gaitzat hartuta; 2 euro haurrak.
- Sagardoa eta itsasoa: Museoetara bisita, itsasontzian ibilaldia eta sagardotegian otordua; 55 euro helduak.
- Sagardoa eta gazta: Museo gastronomikoak, gaztandegiak eta sagardotegiak; 34 eurotik aurrera.
- Sagar muztioaren elaborazioa: Sagarrak kizkiarekin bildu, pisoekin jo, prentsatu eta egindako muztioa dastatu (irailetik aurrera); 50 euro taldeak.
- Sagardogile egun batez!: Familientzako jarduerak; 4 euro helduak.
- Txotx! euskeraz: Euskaltegientzako sagardogintzako euskerazko hiztegia lantzeko bisita berezia (bisita+kata); 3,50 euro pertsonako.
Beste hainbat ekintza Astigarragatik kanpo izango dira. Informaziorako eta erreserbak egiteko: 943 55 05 75 edo www.sagardoarenlurraldea.com.
Horrez gain, ibilbideak ere badira: Santiomendiko Sagardo Bidea, besteak beste. Eta Santiago bidea ere bertatik pasatzen dela nabarmentzekoa da. Astigarragatik Hernanira, eta handik Urnietara jarraitzen du.
Informazioa: sagardoarenlurraldea.com; hernaniturismoa.com; urumeaarnastu.com
Erdi Aroko Hernani ezagutu nahi?
Abuztuan zehar, Hernaniko herrigune historikoa ezagutzeko bisita gidatua eskaintzen du Udalak. Hernaniko kaxkoa Euskal Herriko interes historiko-artistikodun guneetako bat da. Bisita gidatu honen bidez, Erdi Aroko Hernani ezagutzeko aukera izango da: armarriak, dorretxeak, garaiko gizartearen bitxikeriak... Egunak eta orduak zehaztu gabe daude, eskariaren arabera izango da. Doan da. Erreserbak eta informazio gehiago: 943 33 70 28 edo www.hernaniturismoa.com.
Horrez gain, beste hainbat txoko ere badira interesgarriak Hernanin: Santa Barbara gotorlekua eta mendia, Nere Borda parke botanikoa... Eta ibilbideak ugari: Aiako Harrira, Sagardotegiak, Oindiri bira...
Esperientziak eta ibilbideak, Ereñotzu, Arano eta Goizuetan
Esperientzia desberdinak ere badaude aukeran, gainerako herrietan: Ereñotzun, eztiaren esperientzia (943 55 10 00); eta Goizuetan, etxeen bisita gidatua (649 548 608). Ibilbideak ere ez dira falta: Ereñotzun hamaika bat badira zehaztuta; Aranon, lau bat; eta Goizuetan, sei.
Turismoari buruzko informazio guztia lortzeko: www.urumeaarnastu.com.