Azysa Binakako Txapelketa Nagusia larunbatean hasiko da Galarretan, final laurdenetako aurreneko partiduarekin. Sei bikotek hartuko dute parte, bi taldetan banatuta. A taldea Ezkurra eta Olazarrek, Juaristi eta Lizasok, eta Urtasun eta San Miguelek osatzen dute. B taldean berriz, arituko dira Zeberio eta Ion, Urriza eta Etxeberria IIIa eta Uterga eta Urrutia Ia. Kike Elizaldek atzoko aurkezpenean adierazi zuenez, bikote oso orekatuak dira, eta txapelketa hasi aurretik behintzat ez dago faboritorik.
Finalerdietara talde
bakoitzeko bi bikote
onenak sailkatuko dira
Final laurdenetako partidu guztiak Galarretan jokatuko dira, eta larunbatekoan Ezkurra eta Olazarrek jokatuko dute Juaristi eta Lizasoren kontra, arratsaldeko 16:00etan hasita. Taldeka jokatuko dira final laurdenak, hau da, bi taldeak ez dira gurutzatuko. Hortaz, talde bakoitzeko hiru bikoteek elkarren kontra jokatuko dute, eta finalerdietara bi aurrenekoak sailkatuko dira. Berdinketaren bat egongo balitz, tantu gehien egin dituena pasako litzateke. Finalerdiak berriz, bi partidutara jokatuko dira, joan-etorrian, Galarretan eta Euskalen. A taldeko aurreneko bikoteak B taldeko bigarren bikotearen kontra jokatuko du, eta A taldeko bigarrenak, B taldeko aurrenekoaren kontra. Bikote bakoitzak partidu bat irabaziko balu, berdinketa desegiteko hirugarren partidua jokatuko litzateke. Final haundira bi bikote onenak pasako dira. Abenduaren 18an jokatuko da, Galarretan.