Baltasar Garzonek aginduta, 2003an Udalbiltzaren kontrako auzia hasi zen. 22 pertsona auzipetu zituen, eta Udalbiltzaren behin betiko disoluzioa agindu. Akusazioek 10 urte eta 23 urte bitarteko kartzela zigorrak eskatzen dituzte, eta abokatuek kargu guztiak bertan behera uzteko, «ez dagoelako akusatuen kontrako froga dokumentatu bat bera ere». Epaia uztaila eta irailean izango da. Saioak: uztailaren 15-16-22-23an, eta irailean sei egunetan. Auziaren kontra, eta Udalbiltzaren alde, Babes Taldeak sortu dituzte Euskal Herriko hainbat herritan, eta baita Hernanin ere. Manuel Fraile eta Agustin Ezponda dira Babes Taldeko bi kide, eta Kronikari azaldu dizkiote taldearen helburuak zein diren. Bi auzipeturekin ere hitz egin du Kronikak, Karmele Urbistondo Urnietako zinegotzi ohiarekin, eta Juan Carlos Alduntzin Pasaiako Alkate ohiarekin.
«Froga dokumentaturik ez»
Urbistondo eta Alduntzin dira auzipetutako 22 kideetako bi. Diotenez, akusazioak ez dauka froga dokumentaturik beraiek ETArekin lotzeko, eta dena «epaile baten hipotesi bat» da. «Udalbiltzako kide ginela? Horixe! Guk ez dugu hori ukatzen, eta ez dugu ukatuko. 1.500 zinegotzik aukeratu gintuzten. Baina zer delitu dago hor? Zer delitu egin dugu? Ekonomikoa? Dirua jasotzen zuela Udalbiltzak? Noski. Eta diru guztia publikoa zen; Udaletxe askok egin zuten aportazioa, Plenoek hala erabakita. Erabaki publikoak dira denak».
Udalbiltzak jaso zuen diru pribatu bakarra 400.000 euro izan omen ziren, Zuberoari laguntzeko egindako kanpainarenak. «Diru haiek denak bloketatuta daude», diote auzipetuek. «Gainerako diru guztiak publikoak dira, Euskadiko diru-kontu publikoen Auzitegiak ere halaxe dio». «Baina bestela ere, gu ETArekin lotzeko zein froga da hori?».
«Erabaki politikoa»
Auzia erabat politikoa dela diote Babes Taldeko kideek. «Beldurtu egin ziren, Udalbiltzaren bidez oso elkarlan bat hasi zelako Euskal Herriko herri askoren artean; mugaz bi aldeko herrien artean... Oso interesgarria zen guretzat, eta oso inkomodoa estatuarentzat. Eta kitto! Horregatik desegin zuten». Mugaz bi aldeko herrien elkarlana gero eta normalagoa dela diote lau kideek, Europa eta mundu mailan, eta hori delitu izendatzeko arrazoi bat bera ere ez dagoela.
«Gu udal zinegotziak izandakoak gara. Udalbiltza egitea guk erabaki genuen, 1.500 zinegotzik publikoki. Alderdi askotako zinegotziak ginen tartean. Udalbiltzako hautetsiak ere hala erabaki ziren. Euren delitua gure delitua da orduan, ezta? Horregatik gara Babes Taldeko kide. Gure babesa zuten orduan, eta daukate orain», dio Frailek.
Auziaren kontrako bi ekintza
Hernaniko Babes Taldeak elkarretaratzea deitu du, bihar, 12:30etan Gudarien plazan. Ekainaren 23an, San Joan suarean inguruan, elkarretaratzea eta dantza egingo dituzte.