GALARRETAN egitekoa den Parke Teknologikoaren bultzatzaile Orona enpresa izan da. Oronak ikerketa eta garapenerako zentru bezala definitu du proiektua, eta Mondragon Korporazioko kide diren Ikerlan eta Mondragon Unibertsitatearekin sortuko du Ikasleku Fundazioa, Galarretako Parkearen erdia inguru hartuko duena. Hernaniko Kronikak Javier Mutuberriarekin hitz egin du, Oronako Zuzendari Nagusiarekin. Mutuberriak esandakoaren arabera aspaldian zuen Oronak zabaltzeko asmoa, «2004an egoitza berria inauguratu genuenean ari ginen pentsatzen hurrengoan. Zure proiektu enpresariala hazkundearekin lotzen baduzu, azpiegituren proiekzioa eta etorkizuna ezinbestekoa da». Galarreta oso leku aproposa dela irizten dio Mutuberriak: «Hernani delako (bertako enpresa izanda badugu nolabaiteko ´zor` hori Hernanirekin), Parke Teknologikoa delako, eta bisiblea delako; Donostialdearen foko estrategikotzat hartu liteke».
«Orona EIC guztia bertan»
Batez ere, ikerketa eta garapenerako sekzioa jarriko du Oronak Galarretan. Lehen ere asko inbertitzen du Oronak i+g alorrean, eta horren adibide da Orona EIC (Elevator Innovation Centre). 150 profesional ari dira i+g alorrean lanean, eta 10 milioi euro bideratzen ditu horretara.
Galarreta proiektuan bilduko du Oronak Orona EIC osoa, promozio zentroa, eta korporazioaren hainbat egoitza eta azpiegitura ere bertara eramango ditu.
Ikasleku Fundazioa: Ikerlan, MU eta Orona
Oronak ikerketa eta garapenean, elkarlanean egin izan du lan Ikerlan eta MUrekin. Horregatik, Galarretako ideia Oronak bultzatutakoa bada ere, proiektua Mondragon Korporazioko hiru kideek osatzen dute. Ikasleku Fundazioa sortu dute, eta hark gestionatua izango da Parke Teknologikoaren %50 inguru.
Hernaniarrentzat ‘ikur’
Mutuberriaren ustez, Ikasleku ikur bihurtuko da Hernanirentzat, «Aukera ederra da Hernaniko gazteriarentzako, bere bide profesionala garatzeko: arlo teknikoa, ingenieritza, ekitzaile perfila duten pertsonentzat».
ORONA
Orona osatzen dute: Orona S.Coop jatorrizkoak eta Electra Vitoria S.Coop enpresak. Horiek dira nolabait Mondragon Korporazioan (MCC) Elevación Dibisioa eratzen dutenak:
DATUAK:
-Bi kooperatiba hauek filialak dituzte, munduko hainbat lekutan: Portugalen, Frantzian eta abar. Guztira: 28-30 enpresa.
-Lapostuak: 4.000
-Fakturazioa: 500.000.000 euro
-Ikerketa eta garapenean, barruan eta kanpoan 150 ingeniari.
-’20tik 1 Orona’: Munduko 20
igogailu berrietatik 1 Orona da.
-180.000 aparatu martxan
Oronak sortuak eta banatuak.
-92 herrialdeetara bidaltzen
ditugu igogailuak.