Mandio zaharretik sartu, eta haritz enbor zimurtu batek egingo digu agurra. XVI. mendekoa da, gotikoa, Iparragirre tolare-baserria zela adierazten duena. Etorkizunera sartuko gara, Iparragirreko Sagardo Gunera, bertakoei, turistei eta bisitariei sagardotegia barru-barrutik erakusteko tokira.
Bisita gidatuak, sagardo katak eta bertako produktuen maridajeak, tolare zaharra ikusteko aukera... dena, Iparragirre sagardotegi zahar-berrituan.
«Baserri izakera, espazioak, ez genituen galdu nahi»
Iparragirrek joan den asteazkenean aurkeztu zuen Sagardo Gunea, eta jende asko bildu zen, sagardoaren eta turismoaren munduko jendea, gastronomiarekin lotutakoa, herritarrak, komunikabideak eta ordezkari politikoak. Arantxa Eguzkitzak gidatu zuen aurkezpena, Maialen Lujanbiok abiatu zuena, hiru bertso dotore botata, mandioko atetik: «Sagardo gune hontan ikusi, ahal izango da dena, nola gehiago gozatzen baitan, zer den ezagutzen dena».
Eguzkitzak adierazi zuen, Iparragirre berritu nahi zutela bioeraikuntzako irizpideak erabilita. Hasi bezain azkar konturatu omen ziren arkitektoak baserriaren balioaz, Josu Jauregi, Olatz Jauregi, eta Iñigo Etxezarreta. «Tolare zaharra bisitagarri egin nahi genuen eta baserri izakera, espazioak, ez genituen galdu nahi. Horrek eraman gaitu pixkanaka baserriko sorrerarekin bat egitera. Eta Josuk esan zigunean bertako zutabe eta habe batzuk gotikoak zirela, hain zuzen baserriak sagardo fabrika bezela sortu ziren garaikoak, zentzu guztia bilatu genion ganbara zaharra sagardo gune bihurtzeari».
Dastatze gunean katak eta maridajeak izango dira, eta hilean behin munduko sagardoak probatzeko aukera.
Ibon Aburuzak, Gipuzkoako Sagardogileen elkarteko lehendakariordeak azpimarratu zuen, Iparragirrek izan duen ausardia, krisi garaiotan apustu hori egiteko.
«Ekologikoaren aldeko apustua etorkizuna da»
Koldo Lizarraldek, Diputazioko Landa Garapeneko zuzendariak, kalitatearen aldeko apustua azpimarratu zuen, eta ze garrantzia duen bertakoaren eta ekologikoaren aldeko apustuak, «ekologikoak bermatzen digu nekazaritza iraunkor bat, eta etorkizuna, nekazaritzarentzat».
«Pauso bat harago planteatu duzue»
Bittor Orozek, Eusko Jaurlaritzako Elikagaien politikako sailburuordeak, adierazi zuen, Iparragirrek pauso bat harago eman duela planteamendu honekin, «etorkizunari begiratu diozue, baina arbasoak kontuan hartuta. Horrez gain, turismoari balio erantsia eman diozue, eta beste aukera bat gehiago. Gainera, ez duzue sagardoan bakarrik pentsatu, lekua eman diezue beste produktuei ere».
Kata eta maridajea, bisitariei
Juan Zuriarrain enologoak maridaje txiki bat egin zuen. Iparragirreko hiru sagardoak aipatu zituen, eta Beobide izenekoa azpimarratu, Label-Ekologikoa, eta Iparragirreko izarra. Juanjo Usarraga sukaldariak egindako pintxoak probatu ziren, eta baita Labeleko beste produktu batzuk ere, Basatxerri urdaiazpikoa, Euskal Okelaren okel-taloak, eta txuleta, esaterako.
Urte guztian zabalik
Iparragirrek txotx denboraldian orain arte bezala jarraituko du, baina horrez gain, urte guztian zabalik izango dute terraza eta jangela, bertako produktuekin, ostiral, larunbat eta igandeetan, 12:00etatik aurrera. Sagardoa botilan probatu eta aukeran izango dira, razioak, pintxoak, eta menu ezberdinak.
Dastatze gunea: mandiotik sartuko gara dastatze gunera, sagardo gunearen bihotzera. Sagardo dastatzeak eta maridajeak egingo dira bertan, eta hilean behin, munduko sagardoak probatuko dira.
Bisita gidatuak egingo dira sagastitik boteilara, sagardotegiaren mundua ezagutzeko. Lau hizkuntza aukeran eta gor-mutuentzako hizkuntza ere bai. Bisita ostean, aukera egongo da Iparragirreko hiru sagardoak probatu eta pintxo bat jan edo bertako menua probatzeko.
Iparragirre ikasgelan batetik ikastetxeentzako eskaintza berezia izango dute, sagargintza eta sagardogintza zer den ikasteko. Horrez gain, Juan Zuriarrain enologoak sagardo kataren oinarriak erakutsiko dizkie hasi-berriei.
Iparragirre Lagun Taldean apuntatu liteke nahi duena, eta eskaintza eta abantailak izango ditu.
Ate irekiak, gaur eta bihar
Ikusteko aukera, gaur eta bihar, 12:00etatik aurrrera. Deitu aurrez: 943 55 03 28.