Gaur banatuko dira sariak, Dobera Euskara Elkarteak sagardotegietan antolatu duen Bota bertsoa! paper lehiaketan parte hartu dutenen artean.
Guztira, 27 sagardotegitan egin da lehiaketa: Hernaniko Alberro, Altzueta, Goiko Lastola, Iparragirre, Itxasburu, Larre Gain, Olaizola, Otsua-enea, Rufino eta Zelaian; Astigarragako Alorrenea, Astarbe, Bereziartua, Gurutzeta, Ipintza, Larrarte, Lizeaga, Oialume Zar, Oiarbide, Petritegi, Rezola, Roxario, Sarasola eta Zapiainen; eta Urnietako Elutxeta, Eula eta Oianumen.
Denen artean, 200dik gora bertso jaso dira, era guztietakoak, eta sariak ere asko izango dira, sagardotegiek emanak.
Sari banaketa, kantuan
Gaur arratsaldeko 19:00etan egingo da sari banaketa, Biteri kultur etxean. Bertan jakinaraziko dira zein izan diren saridunak, eta horietako batzuk saritutako bertsoak kantatuko dituzte, Hernaniko Iraulio Panttalone bertso eskolako kideek lagunduta. Saioa irekia da, eta beraz, bertso emanalditxo batez gozatzeko aukera izango da.
Denera, 25 bertsotik gora saritu dira, era guztietakoak: sakonena, umoretsuena, poetikoena, teknikoena, xelebreena...
Gaur etorri ezin dutenek, sariak Doberan
Bertso sarituen egileei jakinaraziko zaie zein sari irabazi duten, eta gaurko emanaldira etorri ezin dutenek, astelehenetik aurrera jaso ahal izango dituzte dagozkienak, Doberako bulegotik pasata.
Sariak sagardotegiek jarri dituzte: sagardo kajak, Aimar Olaizolaren kamixeta, 2 lagunentzako otorduak...
Sagardogileek nabarmendu dute giro ona sortu dela, eta datorren urtean errepikatzeko asmoa azaldu dute.