Atzo kirol egokitua probatzeko aukera izan zuten Atsegindegira gerturatu zirenek; desgaitasunen bat duten pertsonen lekuan jartzea zen helburua. Antolatzaile lanetan aritu ziren Koxka elkartea, Kemen (Euskadiko desgaitasuna duten pertsonen elkartea), Hernandes (Hernaniko boluntarioak), AGI (bista gabezia dutenen Gipuzkoako elkartea), eta AGAEB (bizkar-hezur bifidoa dutenen Gipuzkoako elkartea).
Gaur eta bihar ere, beste hainbat ekintza izango dira.
Oinez ibili eta kirol-makinak ezagutzeko aukera, gaur
Gaurko antolatu den oinezkoentzako ibilbideak hiru helburu ditu: ariketa fisikoa egitea sustatzea, Hernanin aisialdirako eta deskantsurako dauden guneak ezagutzea, eta lau parketan jarri diren adinekoentzako kirol-makinak ezagutzea.
Goizeko 10:00etan jarri dute zita, Goiz Eguzkin, eta eguerdiko 12:00etan bukatuko da buelta, igerileku irekien parean. Ibilaldian zehar, Zikuñaga, Goiz Eguzki, atletismoko pista eta Ave Maria parkean jarritako adinekoentzako kirol-makinak ezagutu eta probatzeko aukera izango da. Makina hauek jarri dira kirol espazioen beharren hausnarketa parte-hartzailean herritarrek egindako eskaeraren ondoren.
Bizikletan buelta, eta Bide Heziketa zirkuitoa, bihar
Bihar, berriz, bizikletan ibiltzeko aukera izango da, Bizikleta Festan. Ikastetxeetako guraso elkarteen eta JOCC txirrindulari taldearen laguntzarekin, ibilbide bat markatu da herriko bidegorriak ezagutzeko. Goizeko 09:30etan jarri dute zita, Plaza Berrin, eta 12:00etan bukatuko da buelta. Hala ere, zirkuitu irekia izango da, eta bakoitzak nahi duenean eta nahi duen tokian hasi eta bukatu ahal izango du.
Bestalde, goizeko 09:30etatik 12:00ak bitartean, baita ere, Bide Heziketa Zirkuitua egongo da Atsegindegin.
Patinetan, astea bukatzeko
Mugikortasun Astearen barruan antolatutako azken ekintza patinetan egingo den ibilaldia izango da. Gaur zortzi izango da, hilak 27, goizeko 09:30etan Karabeletik abiatuta.