Gutxi izango dira Incansables txarangaren atzetik dantzan ibili ez diren herritarrak. 42 urte daramazkite jai eta egun bereziak girotzen, eta lan hori diska batean bildu dute orain. Taldea eboluzionatzen joan da, eta musikari gazteen esku dago batuta, azken urteetan. Gogoa eta ilusioa ez zaie falta, eta hortik ideia: «azken diskoa orain 15 urte inguru atera zuten, 2 kideren artean, eta arrakasta dexente izan zuen. Toki guztietan eskatzen ziguten berri bat grabatzeko. Orain talde gaztea elkartu garela aprobetxatu, eta mugitu egin gara, zerbait kaleratu nahian».
Grabazioa, Agorila disketxearekin
Diska berria Iparraldeko Agorila disketxearekin grabatu dute; eta Mikel Fernandez Krutzagaren laguntza ere, izan dute. Euskal Herriko disketxe zaharrenetakoa da, 65 urte inguru izango ditu; eta tradizionalki, oso lotuta dago euskal folkloreari: «gure proposamena onartu zuten, eta aurrera eramatea erabaki genuen. Txarangak, euskal taldeak, erromeriak, dantzarako musikak... esperientzia haundia duen disketxea da. Martxoan grabatu genuen Andoaingo Garate Estudioetan, eta kalean duzue emaitza».
Izenak dioen moduan, Omenez
Txarangako kide ohi guztiak gogoan izan nahi zituzten diska berri honekin, eta hortik Omenez izena: «txarangatik pasa diren guztiei dago eskainia diska. Alde batetik, 1971 urtean txarangari hasiera eman zioten 5 lagunei. Bestetik, hainbeste urte eta gero, gure parte izaten jarraitzen dutenei. Eta bereziki Canariori, bera baita hasiera hasieratik dagoen kide bakarra. Horrez gain, badira abesti batzuk zuzenean pertsona edo kolektiboei dedikatuta daudenak: Mendia, Ni, Beti Egarriak...».
Mota guztietako abestiak, diska berean
Diskak biltzen dituen abestiei erreparatuz gero, denetatik aurki dezakegu. Mota guztietako abestiak sartzen saiatuko direla diote: «saiatu gara txaranga batek eskaini dezakeen guztiari originaltasun puntua ematen: abesti mexikarrak, klasikoak eta ez hain klasikoak, latinoak, cumbiak, kubatarrak, amerikanoa, swinga, dixieland, rocka... Kalejirak ere bildu ditugu: pelikula klasikoetako hiru abesti eta italiar taratelekin egindako bat. Eta nola ez, gaur egungo zenbait kanta euskaldun bertsionatu ditugu: Esne Beltza, Betagarri, Ze esatek!... Eta fandagoa, arin arinak... ere, ez dira falta.
Konposaketa eta moldaketa guztiak txarangako kideek eginak dira, oraingoak eta lehengokoak; eta gehienak Canarioren eskua dute».
Diska, salgai
Omenez diska berria erosi nahi duenak internet bidez erosteko aukera du www.incansablestxaranga.com web orrian, 12 euroan.