Ez da lehenengo aldia Imanol Paollak zortziko emakume talde honi desafio egiten diona. Orain dela 2 urte Spirit zaldiarekin bota zien desafioa, Ergobian, eta galdu egin zuen orduan. Oraingoan, Lautxuri zaldiarekin ariko da. Honek 20 minutu izango ditu, 800 kiloko harriarekin ahalik eta plaza gehien egiteko. Emakume taldeak, berriz, 30 minutu izango ditu, eta harriak 550 kilo pisatuko ditu. Barre artean, Paollak dio «jokoan dagoena ohorea» dela. «Garrantzitsuena da giroa sortzea, eta jendea joatea».
Azkenekoan galdu, eta orain berriro ere desafioa zuk bota?
Taldean parte hartzen duten emakumeak ez dira berdinak eta, hortxe sortu, aitzakia! Zaldia ere ez da berdina izango!
«Beti ematen dugu bentaja, pertsona animaliarekin ez baitago konparatzerik. 8 gizon baino gehiago izan daiteke zaldia».
Spirit erretiratuta daukazu?
Bizkaian ibilitakoa da Spirit, federazioak antolatutako desafio edo probetan eta. Hasi zen esaten ezetz, nik tiratzeko! Erakustaldietarako erabiltzen dugu oraindik, baina deskantsua eman diogu. Bederatzi urte dauzka, eta etxeko gurdiari tiraka ibiltzen da gehienez ere. Orain, gazteak egin behar du lan.
Lautxuri ere Bizkaian entrenatutakoa da?
Oraindik ez. Lautxurik bost urte dauzka. Ondo erakutsi behar zaio lehenengo, eta horretarako, hemengo harri ttikia onena. Hurrengo urtean eramango dugu Bizkaiara.
Nola entrenatzen da zaldia horrelako proba eta desfioetarako?
Normalean, orain, udara aldera astean bitan entrenatzen dugu. Neguan igual gutxixeago, baina hortxe. Gomazko erruedari tiraka ibili behar izaten du, 300 bat kilokoa. Ibiltzea da garrantzitsuena, askotan entrenatzea, eta ez zenbat kilo daramazkin. Segun zein lurretan ibili ere begiratzen da. Errueda gomazkoa da, eta lehorrean gehiago heltzen du.
Nola ikusten duzu Lautxuri?
Inguruko probetan aise moldatzen da, hemengoa harri ttikia izaten baita. Ikasteko eta entrenatzeko horixe onena; harri ttikia. Bizkaian, adibidez, probak zailagoak izaten dira: plaza luzeagoak, kilo gehiago, federazioak antolatu eta kontrolatzen ditu probak...
Nesken taldeak ordu erdi izango du 550 kiloko harriarekin ahalik eta plaza gehien egiteko. Lautxurik, 20 minutu, eta 800 kilo.
Bihar zer gertatuko dela uste duzu? Zaldia ala emakumeak izango dira gehiago?
Bihar, nahiko lan! Dena da kontuan hartzekoa: indarra, erresistentzia, eguraldia, plazako lurra... Hala ere, beti ematen dugu bentaja, pertsona animaliarekin ez baitago konparatzerik. Zortzi gizon baino gehiago izan daiteke zaldia. Nahiz eta zaldiak 550 kilo pisatu, eta 8 pertsonak denen artean gehiago pisatu, gehiago da zaldia.
Aiert, zure ustez zer gertatuko da bihar? Ibiltzen al zara zu zaldiarekin?
Aiert: Entrenatzen eta, aritzen naiz etxean. Gustatzen zait. Zaldiak irabaziko duela esan beharko dut!
Paolla: Horixe! Etxekoaren alde, beti!
Osiñagako plaza txiki samarra ez ote den...
Ni moldatuko naiz. Baina ea zer gertatzen den neskekin. Nik uste dut haiek ere moldatuko direla, igual polikixeago joanda, edo.
Eguraldiak, edo lur motak ere izango du eraginik, ezta?
Osiñagan hormigoizkoa da lurra, eta hormigoiaren kontra jotzean harriak pasta moduko bat egiten du. Horrek gehiago frenatzen du. Beraz, lurra lehor, hobe denentzat! Baita ikustera gerturatzen direnentzako ere!
Izango al da ezer jokoan?
Jokoan, jokoan... (barrez). Ohorea dago jokoan! Baina garrantzitsuena da jendea gerturatzea, biltzea, eta ikuskizunarekin gozatzea. Giroa jartzea.
Irabazi ala ez, helbururik jarri diozu zure buruari?
Minutuko 3 bat plaza egin nahiko nituzke; 20 minututan 60! Ikusiko da!