Udako oporrak gertu dira, eta Karmelo Labakan Lanbide Heziketa ikasten ari diren ikasleak ikasturteko azken txanpan dira. Beste hainbat aukeren artean, Erdi Mailako eta Goi Mailako ikasketak egiteko aukera eskaintzen dute. Alde teorikoari bezainbesteko garrantzia ematen diote praktikoari, eta ziklo amaieran, enpresa ezberdinetan eskarmentua hartzeko tartea izaten dute ikasleek. Hala nahi dutenek praktikak atzerrian egiteko aukera ere izaten dute. Aurten bost ikaslek eman dute pausu hori eta Italian, Zipren eta Portugalen ari dira praktikak egiten. Datozen lerroetan horietako hiru bizitzen ari diren esperientzia kontatuko du Kronikak.
Ainhoa Larrea eta Sheila Carvajal, Zipren
Animazio Soziokulturala eta Turistikoa zikloko praktikak ari dira egiten Zipren Ainhoa Larrea eta Sheila Carvajal. Nikosian daude, Zipreko hiriburuan, hirugarren adinekoen zentro batean. Hilabete eskas dute aurretik, eta orain arteko balorazioa bi adjetiborekin deskribatu dute, zoragarria eta paregabea: «oso positiboa da bizitzen ari garen guztia. Munduko txoko ezberdinetako pertsonak ezagutu ditugu, baita euskaldun pare bat ere. Zipreko kultura gertuagotik ezagutzeko aukera ere ari gara izaten; bertako lagunak egin ditugu, eta hain turistikoak ez diren bazterrak ezagutzeko aukera ari gara izaten»
«Gure burua hobeto ezagutzen ari gara eta etorkizunera begira ditugun amets eta proiektuak argitzeko balio
izan digu»
Praktikak atzerrian egitearena ideia ona dela diote: «askatasun haundia ematen digu enpresak. Eguneroko lanean ez dira gainean egoten diren horietakoak, ez dugu laguntza askorik jasotzen. Baina horrek badu bere alde ona. Hemen gaudenetik iniziatiba gehiago dugu. Ikasteko gogoz etorri gara, eta dugun onena ematen ari gara»
Elkarbizitzak duen garrantzia ere lehenengo pertsonan ezagutu dute: «beste pertsona batzuekin bizitzeak asko erakusten du; ohitura ezberdinetara egokitu behar zara... Hemen gure burua gehiago ari gara ezagutzen, eta etorkizunera begira ditugun proiektu eta ametsak argitzeko balio izan digu».
Etorkizunera begira, bizitzen ari diren esperientziak lan munduan intengratzeko balioko diela uste dute bi gazteek: «enpresa baten funtzionamendua gertutik ikusi dugu, eta bertan lan egiten ikasi dugu, zailtasun ugari gaindituz. Taldean egin izan dugu lan, eta honek, garrantzi haundia du ekintzak eta programazio ezberdinak sortzerakoan. Beste pentsamendu eta iritzietara moldatu gara, entzuten ikasi dugu, iritziak elkartrukatzen, gatazkei aurre egiten...»
Eneritz Olasagasti, Portugalen
Lisboan, Portugalgo hiriburuan ari da Eneritz Olasagasti praktikak egiten; zehazki, Liga izeneko fundazio batean. Dio esperientzia oso aberasgarria ari dela izaten, lehenengo aldia baita etxetik kanpo bizitzen ari dela: «asko ari naiz ikasten, beste herrialde bateko lan mundua ari bainaiz ezagutzen; aberasgarria ari da izaten».
Esperientziaren alde positiboak aipatzerakoan, gazteak dio, bertako jendea ezagutzeaz gain, kultura, hizkuntza eta bizitzeko modua ere ezagutzen ari dela: «eta gainera, etxetik kanpo bizitzeko aukera izan dut bekari esker».
Praktikak atzerriko enpresa batean egiteko aukera duen guztiari, zalantzarik ez izateko esan nahi die Olasagastik: «nik aurreko bietan aukera pasatzen utzi nuen, eta hirugarrengoan heldu diot. Ez naiz damutzen».
«Halako esperientziaren bat bizitzeko aukera duenari bi aldiz ez pentsatzeko esango nioke. Oso aberasgarria da»
Etorkizunera begira, ez daki bizitzen ari den esperientziak lagunduko ote dion lana bilatzeko garaian: «ez dakit hemen ikasitakoak erraztuko didan ala ez; baietz pentsatu nahi dut. Hala ere, lan mundua nola dagoen ikusita, nork daki. Esperientzia ahaztezina izango dela behintzat, badakit!».