Hartu beharreko azken erabakia izango da, izenarena; Emakumeen Etxea nolakoa izango den eta zertarako erabiliko den erabakitzeko parte-hartze prozesua egin da Hernanin, eta prozesua bukatzeko, izena jartzea falta da.
Hiru izen jarri dira aukeran, eta ostiralera arteko epea dago botoa emateko.
Leokai edo Leokaia, Ekhiñe eta Amarauna edo Emarauna
Botoa emateko, erabaki.hernani.eus webgunera jo behar da. Bertan ikusi daitezke zein diren aukeran dauden izenak, eta zein den bakoitzaren esanahia.
Leoka edo Leokaia proposamenak, bi izen lotzen ditu. Batetik, Leoka; herriko toki esanguratsua eta Jabetze Eskoletako ikasturteari hasiera ematen zion lekua. Bestetik, kaia; babes gunea, iritsi eta abiatzeko gunea, pertsona eta kultura desberdinek topo egiteko lekua...
Beste proposamen bat da, Ekhiñe: Andre Kalearen izena berreskuratzean, kalearen inguruan sortutako kondairako protagonistetako baten izena da; borrokalariarena.
Azkenik, Amarauna edo Emarauna proposatu da; armiarma sarea esan nahi du, eta emakumeen, feministen eta espazio horretan landuko diren gaien inguruko saretzea eta elkarlana irudikatzen ditu.
Erabakiaren berri, asteleheneko bilera irekian
Webgunearen bidez boto gehien jasotzen dituen izena hartuko du Emakumeen Etxeak. Asteleheneko bilera irekian emango da emaitzaren berri, arratsaldeko 18:00etan, Plaza Feministan (Aristizabal 7).