Astero aritzen dira, eta kalean dabilenak ezagutzen ditu. Gaua eta taberna dituzte gustoko, ordu txikiak nahiago, eta laguna behar dute ondoan, eta tragoa, ahal bada. Tabernetako bertsolariek kasta berezia dute, eta bereiztasun hori urtero ikusten da Hernanin, Garin tabernan, euren egun haundia izaten baitute: jende aurrean elkar probatzeko eguna: Tabernetako Bertsolarien Txapelketa. Bihar jokatuko da Tabernetako Bertsolarien Txapelketa, 19:00etan, Garinen, eta gutxienez 11 bertsolari ariko dira, bihar azaldu litezkeenak kontatu gabe. Elur Txori elkartean dute bazkaria, eta bazkal ondoan elkar pixka bat probatuta azalduko dira seguruenera, Garingo tabladura, lehendik ere plaza hori ondo ezagutzen duten urtean behingo protagonistak: Oier, Oxan, Alkorta, Aingeru eta Haritz, Otxoto, Iraitz, Xapo, Joseba, Gorkita eta Iñigo. Gai jartzen, Arnaitz Lasarte, eta epaile lanetan: Peruarena, Casado, Zapi eta Muñoa.
20 urte ‘belarriya jaten’
Gaurko errealitatea ere bazen orain dela 20 urte. Tabernetan famatua zen «elkarri belarriya jaten» ari ziren bertsolarien kantua. Zeinenak zuen indar haundiagoa, hori zen kontua. Eta txapelketa egin zuten, 1995ean, eta batenak baino gehiago, denenak hartu zuen indarra... gaur ere irauten duena.
1995ean Jarki taberna leporaino bete zen
Hogei urte ez dira berehala pasatzen, eta hogei urte horietan plaza erabat bete izana da, tabernetako txapelketaren arrakastarik haundiena. 1995ean Iñaki Iurrebaso Iurrek irabazi zuen, Jarki tabernan. Hurrengo biak ere hantxe jokatu ziren eta Olanok eta Txuriyak irabazi zituzten. Iruntxin, gaurko Tripontzin, Aritz Zerainek irabazi zuen, eta Garinen egin zen lehenengoa Toloxak. Exteban urtero hor izaten zen, eta seigarrena hark jantzi zuen, 2000 urtean.
2001ekoa berezia izan zen, Txapeldunen Txapelketa jokatu baitzen. Hura, Ereñotzura joan zen, Zerainen eskutik. Geroztik hainbat txapeldun berri izan dira. Oxanek merezimenduak eginak zituen urtez urte, eta irabazi zuen bat, 2002an, eta baita bigarrena ere, 2009an. Txuriya da bi dituen bestea, 2003an jantzi baitzuen. Xapo ere ez zen ba urruti izaten... eta 2004koa harentzat izan zen. Leitzara, Astigarragara eta Irunera ere joan da txapela, Riaño, Casado eta Ugartek eramanda. Abillatsera berriz, Angelek eraman du, Larre-Gaineran Lasartek, Martindegira Barrenetxeak, Osiñagara Iurramendik, eta Fagollagara, azkena, Pagolak.
AURTEN BERTSOTAN
Azken orduko inkorporazioak kenduta, hauexek izango dira aurten 20garren txapelaren bila lehiatuko direnak: Oier, Oxan, Alkorta, Aingeru eta Haritz, Otxoto, Iraitz, Xapo, Joseba, Gorkita eta Iñigo.