Aurreko igandean, Lazkaoko krosa jokatu zen eta beste behin, hernaniar korrikalarien presentzia nabarmena izan zen kategoria desberdinetan. CD Hernani Atletismo taldeko korrikalari dexentek hartu zuten parte eta sekulako emaitzak lortu zituzten, hiruk. Ibai Alba, Yohanes Merino eta Julen Goikoetxea podiumera igo ziren.
Alba, txapeldun
Ibai Albak senior mailan irabazi zuen, 7,7 km-ko lasterketa. Aurreneko hiru kilometroetan, bosgarren postu inguruan ibili zen eta laugarren kilometroa pasatakoan, eraso egin zuen eta aurreneko postuan jarri zen. Pixkanaka, bigarrenari distantzia ateratzen joan zen eta azkenean, 100 metroko distantziarekin irabaztea lortu zuen.
Merino aurrena,
taktika aldatuta
Yohanes Merinok aurreneko postua lortu zuen kadeteetan. Irungo krosean laugarren geratu ostean, Lazkaon taktika aldatzea erabaki zuen eta lasterketa hasieratik erritmo oso altua jarri zuen. 4,1 km-ko lasterketa zen hauena eta lau korrikalariz osatutako talde txiki batek ihes egin zuen. Merinok kontrolatu zuen guztiz ihesaldi hori. Lasterketa osoa berak kontrolatu zuen eta azken itzulian, 1,2 km falta zirenean, aldapa gora atakatu eta besteek ezin izan zioten jarraitu. Helmugara aurreneko postuan iritsi zen, 14’42’’ko denboran.
Goikoetxea hirugarren eta Artola laugarren
Infantil mailan, 2,4 km-ko zirkuitoa egin behar izan zuten. Lehenengo kilometrotik, bost korrikalariko talde txiki batek ihes egin zuen; tartean, Julen Goikoetxea eta Anartz Artolak. Artolak ihes egiteko hainbat saiakera egin zituen, baina ondoko beste lau korrikala-riek jarraitu egiten zioten. Azken 300 metrotan, esprintatzen hasi ziren bost korrikalariak eta indar guztiak erabili ondoren, Goikoetxeak hirugarren postuan pasa zuen helmuga. Artolak laugarren postua lortu zuen.
CD Hernaniko gainerako korrikalariek ere maila ona erakutsi zuten.
«Denboraldia hasteko, modu ezin hobea»
Atletismo taldea oso pozik dago lortutako emaitzekin: «Emaitza oso onak izan dira Atletismo sailarentzat; denboraldia hasteko, modu ezin hobea», azaldu dute.