«Promozio gogorra espero dugu. Iaztik gauzak gutxi aldatu dira, baina uste dugu aldatu dena gure mesederako aldatu dela: Alcobendasek iaztik falta ditu jokalari on batzuk, eta guk iaz baino esperientzia haundiagoa dugu». Rafa Larretxea eta Joxe Elosegi besteak beste, elkarteko zuzendaritza kideak dira, eta bi beterano errugbi elkartean. Hernaniko Kronikak euren iritzia jakin nahi izan du Alcobendasen kontrako promozioaren egunean bertan. Gustora daude aurten egindako denboraldiarekin, eta baikor sumatzen dira.
«Beraiek dena ematera datoz»
Alcobendasek Ohorezko mailara igo nahi du, kosta ahala kosta, eta «dena ematera» etorriko direla diote Larretxeak eta Elosegik. «Urte oso onak izan ditu Alcobendasek, eta Ohorezko mailan egon nahi du berriz. Aurrekontua jaitsi, eta behera eta behera hasi ziren, iaz maila galdu arte. Denboraldi ona egin dute, partidurik galdu gabe, eta play offean hartu dute kolpe bakarra, Santanderreko Independienteren kontra».
Iazko urtearen kopia
Gogorra izan da play offa, Alcobendas eta Independienteren artekoa. Bi partiduak irabazi ditu kanpoko ekipoak, 8-13 eta 12-13. Detaile horiei guztiei begiratuta, iazko kopia bat ematen du aurtengo Promozioak, baina rolak aldatuta. Hernanik iaz gauza bera egin zuen, ligako partidu guztiak irabazi, eta play offa galdu. Dena dela, taldeko arduradunek diote gauza batzuetan badagoela aldea iaztik. «Batez ere bi taldeen egoera aldatu da. Hernanik gora egin du, eta Alcobendasek ez dugu uste hainbeste egin duenik. Gainera, iaz beraiek burumakur iritsi ziren Promoziora, eta gu ilusioz gaude».
Klabe txikiak,
eta klabe haundiak
Promozioan beti eragin lezake urduritasunak, arbitroak, baja kopuruak, eta ez dago dena aurrez ikusterik. Horrez gain, Alcobendasen zelaia ondo gogoan dute hernaniarrek iaztik. «Zelaia kaxkarra da, putzututa egoten da, eta joko motxa egin behar izaten da, gertukoa; eskura jokatzea oso zaila da».
Hernaniri ze joko mota komeni zaion galdetuta, biek diote, aurten bi joko motak egin ditzakeela Hernanik. «Hor egon liteke klabe nagusia, iazko Promozioa kontuan hartuta. Nik uste dut aurrean egongo dela gakoa», dio Larretxeak. «Defentsa asko landu dugu aurten, eta esperientzia hartuta datoz aurrelariak». Elosegik dioenez, asko nabaritu da Jon Intxaustik entrenamenduetan eman duen laguntza. «Denboraldi bukaeran gure paketea ez zuen inork atzera arrastaka eramaten, eta denboraldi hasieran bai». Larretxeak kiloak azpimarratu ditu: «gure 8 aurrelarien artean ez dituzte 800 kilo osatzen, eta hala ere, talde haundiagoei eutsi egin diegu».
Patrick Polidori: «Guk jarri behar dugu erritmoa»
Elkarrizketa puntu horretan zela, lujozko hirukotea sartu da Landareko bulegoan: Patrick Polidori, Jon Iraola eta Boli Seco, taldeko hiru entrenatzaileak. Polidorik talde osoa aipatu du, hor dagoela klabea. «Talde osoak dauka klabea. Beraiei 4-5 falta zaizkie, gu moralez ondo gaude, baina aurten errematatzeko orduan ez dugu asmatu. Hor asmatu behar dugu, eta erritmoa guk jarri behar dugu. Gu beste erritmo batean jokatzen aritu gara, eta hori asko nabaritu liteke. Ez dugu euren mailara jaitsi behar».
Autobus bat beteta, eta beste bat bidean...
Autobus bat beteta zegoen aste hasierarako eta bigarrena bidean. Gaur abiatu dira 06:00etan Atsegindegitik, Hernaniko ahotsak Madrilen entzun daitezen. Partidua, gaur, 12:30etan Alcobendasko Las Terrazas zelaian.
Hernaniko afizioa aurreikuspenen gainetik
Bueltako partiduan espero da Landare azken belar muturreraino betetzea. Afizioari eskerrak eman nahi dizkiete taldeko arduradunek. «Denboraldi osoan erantzun dute. 900 abonatu egin ditugu, eta horietatik 300 etorri dira partiduero. Batez beste, 800 ikusle izan dira Landaren partiduero. Bagenekien afizioak erantzungo zuela, baina gure aurreikuspenak hautsi dituzte».
Partidua ikusteko
aukera, interneten edo Zintzarri tabernan
Zuzenean partidua ikusteko aukera badago Madrileraino joan gabe. Astero bezala, Zintzarri tabernan ikusgai izango da partidua. Internetez: www.alcobendasrugby.com.
Hernaniren filosofia:
50 lagunetik gora lanean
Harrobiko jokalariekin soilik ari da Hernani, eta horrek harrotasuna bezainbesteko lana eskatzen du. 50 lagun ari dira lanean Hernanin: 9 lagun zuzendaritzan, 24 lagun entrenatzaile lanetan, eta beste 20 lagun inguru azpiegitura lanetan: talde ekonomikoa, mantenimendua... Denei eskerrak eman nahi dizkie taldeak, egiten duten lanagatik. «Ezin ditugu ahaztu, batetik Juan Rodriguez lehendakaria, ezin konta ahala ordu sartzen ari delako; gurasoei ere eskerrik beroenak, beti hor daudelako; gure espontsorrei ere eskerrik asko; Udalari, Kirolgiri, eta nola ez, Hernaniko afizio guztiari: eskerrik asko denei».