Ezusteko aukera izan du Endika Bengoetxea hernaniarrak, bere ametsaren bidea urratzen hasteko: «teatro musikala egin nahi dut, hori da nire ametsa, eta Go!azen telesailean parte hartzea perfektua izango litzateke. Juxtu ikasi nahi dudana da, interpretatzen eta abesten».
Hain justu, ETB1eko Bago!az saioan ari zen, Go!azenen bigarren denboraldian aktore izateko txartelaren bila; baina bigarren saioan kanporatu zuten, asteazkenean: «pena izan da, baina oso pozik nago egindakoarekin; esperientzia polita izan da».
Egin dituen bi saioak, ez dira nolanahikoak izan. Louis Armstrong interpretatu zuen aurrenekoan: «estresantea izan zen! Aurrena Go!azenen abestia kantatu behar izan nuen, korrika joan karakterizazioa egitera makillajean, eta korrika abestera atera. Egia esan, ez nuen ondo pasa aurreneko gala horretan». Bigarrenean, berriz, EH Sukarra interpretatu zuen.
Bengoetxeak dio, «gustora» aritu dela, baina telebistak «presio puntu hori» sartzen duela: «egin behar duzu juxtu hau, oraintxe bertan. Kamara bat jartzen dizute, eta abestu egin behar duzu. Eta agian ez zaizu ateratzen momentuan».
«Brometan esan nion amari, ea aurkeztuko al nintzen»
Go!azen telesaila ikusten ari zela jakin zuen Bengoetxeak, probak egingo zituztela Bago!az saioan parte hartu eta telesaileko hurrengo aktorea aukeratzeko: «amarekin nengoen eta brometan esan nion, ea aurkeztuko al nintzen. Eta bideoa egin nuen, bost minututan, pianoa jotzen eta abesten. Gero, deitu zidatenean kastina egiteko, pentsatu nuen, ai ama, ze liotan sartzen ari naizen. Baina esperantzarik gabe joan nintzen, eta hartu nindutela esan zidatenean, oso arraroa egin zitzaidan, ez nuen sinesten. Baina poz haundia hartu nuen, noski!», kontatu digu.
Teatro musikala ikasteko, bereziki prestatzen
Txikitatik daramaki musikaren munduan: lau urterekin hasi zen Hernaniko musika eskolan, musika ikasten eta abesten; eta zortzirekin hasi zen pianoa jotzen. Garbi zeukan, bide horretatik jarraitu nahi zuela, eta antzerkia ere gustuko duenez... Bartzelonan ikasi nahi du teatro musikala, eta horretarako, bereziki prestatzen ari da, musika, kantu eta antzerki klaseekin: «etorkizun gutxi omen dago teatro musikalean, baina nire ametsa da, eta behintzat, saiatu egin nahi dut».