Beste hausnarketa saio bat izango dute ostegun honetan, hezkuntzaren inguruan, udaletxeko areto nagusian. Etzi egingo du otsaileko hezkuntza eskola, Hernaniko Hezkuntza Plataformak, 19:00etan hasita. Eta bertan, ebaluazio sistemei buruz ariko dira.
«Hezkuntzari buruzko hausnarketa egitean, etengabeko garapen integrala eta hobekuntza datozkigu burura, eta baita horretarako irakasleen prestakuntzaren garrantzia ere. Pentsatzen dugu ikastetxeek, beharrak eta nahiak betetzen dituztela, prozesuaren etengabeko ebaluazioa eginez», azaldu du Hezkuntza Plataformak.
Baina gaineratu du, orain oztopoak dauzkatela ebaluazio hori egokia izan dadin: «tamalez, gaur egun zailtasunak besterik ez ditugu ikusten; are gehiago, LOMCE eta Heziberri legeen ezarpenarekin. Kanpoko ebaluazioak inposatzen dituzte, ebaluazio estandarizatuak, aniztasuna kontutan hartzen ez dutenak, emaitzei bakarrik emanez balioa», kritikatu du.
Eta horren aldean, uste du badaudela «beste ebaluazio eredu batzuk, esperientzia eta alternatibak».
Ruben Iglesias hizlari, etzi
Horri buruz eztabaidatzeko, Ruben Iglesias filosofoa izango da hizlaria, etziko saioan. Gaiaren inguruan ezagutza zabala dauka Iglesiasek; izan ere, Euskal Curriculumaren eraikuntzan aritu da, eta hezkuntza mugimenduko kide ere bada.