Miranda de Ebron ikusi zuen Daniel Gonzalez Catedianok «Goyo izenez sinatzen zuen agurea, egur tailak egiten». Horrelaxe hasi zen bera ere.
Urteetan zehar egin dituen hainbat lan Kide kafetegian ikusi daitezke, erakusketan.
Erretiratuta, ofizioa afizio
Errioxan jaio bazen ere, 45 urte dira Daniel Gonzalez Hernanin bizi dela. «Ikasketa amaierako bidaia batean etorri, eta hemen geratu nintzen!».
Urte hauetan arotza izan da. «Carpinteria Daniel tailerra ireki nuen. Hortik datorkit afizioa. Maiatzean hartu nuen erretiroa, eta orain, semeak jarraitzen du, beste izen batekin: Karpin aroztegia».
Hain zuzen, ofizioak lagundu dio eskuak fintzen, afizioari heltzeko. «Lanak denbora asko kentzen zidan, baina erretiroa hartzean, zaila izaten da denbora betetzen! Erotuta nagoela esaten didate, baina polita da sormena erabilita zerbait egitea. Emazteak ere, Lolak, bolilloak egiten ditu; ostegunetan Biterin, eta asteartetan, etxean, asteartetako klubean!».
«Alokairuan gaude mundu honetan, eta aurkitu genuen bezalaxe utzi behar dugu etorkizuneko belaunaldietarako»
Guztia, naturala
Pailazoaren koadroa da Gonzalezek egin duen aurrenetakoa, baina denak ditu kuttunak. «Gustatzen zaidan argazki bat hartu, haunditu, eta egurraren gainean jarrita hasten naiz egurra lantzen. Makinek laguntzen didate, baina %80a eskuz egiten dut».
Prozesu osoa naturala dela azpimarratzen du; baita erabiltzen dituen barnizak ere. «Kimikoak ez zaizkit gustatzen. Ingurugiroa zaindu behar dugu. Alokairuan gaude mundu honetan, eta aurkitu genuen bezalaxe utzi behar dugu etorkizuneko belaunaldietarako». Horiek iritsi bitartean, ordea, berak jarraituko du, fin asko lanean.