PIRRITX, Porrotx, Marimotots, Pupu, Lore, Belekoi anderea, Patakon pirata... guztiak izango dira Hernanin, igandean. «Baita Zazpikoloroa, koloretako txoria ere; izan ere aurten, Hernanin jaioko da munduari kolorea emateko asmoz». Halaxe azaldu zuen Marimototsek asteartean, prentsaurrean.
Jaialdia, 18:00etatik aurrera izango da Atsegindegi plazan. Sarrerak salgai daude Elkar liburudendan eta Meri (Ikertxo) goxoki dendan. Sarrerarik geratuz gero, egunean bertan ere izango litzake erosteko aukera. Prezioa: 6,5 euro.
Luis Intxauspe alkateak azaldu zuen, urtero frontoian egin bada ere, aurten Atsegindegin egitea erabaki dutela segurtasun plana dela eta. «Frontoiko aforoa mugatu egin da. Lehen 1000 lagun sartu zitezkeen eta orain 650. Hori gutxi da; frontoia txiki geratuko litzake».
Akordeoilari taldeari laguntza
Urtero bezala, Musika Eskolako akordeoilari taldeak antolatu du jaialdia. Bertan bildutako dirua proiektu berri baterako erabiliko dute eta musika zabaltzen joateko aukera izango dute. Aurten esaterako, 40 bat kide Serbiako
Festibalean izan dira, Frantzia, Italia, Suitza, Eslovenia eta Kroazian ibili ostean.
Hala, akordeoilariek, pailazoek eta Udalak herritarrei gonbitea luzatu diete jaialdira azaltzeko. «Denon artean lagunduko dugu mundua kolorez eta musikaz betetzen».