Elkarrekin joan ohi dira gabonak eta musika, bazter guztietan; bai behintzat Hernanin. Txistulari bandak eguberri hasieran eman zuen kontzertua Milagrosan, eta gitarraren soka-hotsak nahastuta aritu ziren gainera. Musika Eskolako olentzeroa izan zen joan den ostiralean, eta trikitilariek eta fanfarreek lagunduta egin zuten ordu-erdiko saioxka. Ostegunean, aldiz, 300 hernaniar bildu ziren San Joan Bautista parrokian, eta urteroko gabonetako kontzertua eskaini zuten. Horiek eta beste hainbat kontzertu izan dira gabonetan, eta oraindik ere bada aukera musika entzuteko, bihartik bertatik hasita.
Milagrosan, txistua, biolina eta kantua, bihar
Kontzertua emango dute bihar, Musika Eskolako txistulariek eta abesbatzak, biolinistak lagun dituztela. 19:00etan Milagrosan.