hernaniarrek irabazi zituzten Erle Eguneko sei saritik bi. Hiru ezti-klase aurkeztu zituzten erlazainek: iluna, argia, eta milalorea. Inoiz baino pote gehiago aurkeztu zituzten, 103 pote: 59 pote, ezti milaloretik; 38 pote, ezti argitik; 16 pote, ezti ilunetik. Yeregik lehenengo saria lortu zuen ezti ilunetan; Agustin Zabalak bigarrena, milalorean. Usurbilen urtero biltzen dira erlazainak, eta igandean ere ez zen jenderik falta, bertako produktu eta erakusketak ikustera. Liztor asiatikoaren kabi bat ikusgai jarri zuen Julian Urkiolak, eta jende gehienak harixe begiratu zion, zomorro horrek egiten duen paperezko etxeari.
Yeregi, Nafarroko eztiarekin
Ramon Yeregik lortu zuen lehendabiziko saria, ezti ilunetan (txillarra, gaztaina eta abarren lorearekin egina). Yeregi hernaniarra da, eta erlauntzak Nafarroan dauzka, Oieregi herrian, Bertiz aranean (izen horrekin saltzen du eztia ere, Bertiz Arana). Yeregi oso ezaguna da eztigileen artean, azken urteetan parte hartu izan duelako txapelketa hauetan. Ezti ilunetan irabazi du. Ezti horrek zapore intentsoa izaten du, eta azkar gogortzen da potean. Dena dela, eztirik aberatsena horixe omen da, apiterapian, osasunerako onena.
Agustin Zabala bigarren, 59ren artean
Agustin Zabala hernaniarrak bigarren saria lortu du milalorea kategorian, hain zuzen pote gehien aurkeztu zituzten mailan (59 pote guztira). Zabalak Elizatxon ditu erlauntzak, eta baita Akurrietan, Urruzunon, Usokoerrekan eta Aranon ere. Milalorea da, lore bat baino gehiagorekin egindako eztia, oso osasungarria, hori ere. Oindi tabernan dauka salgai Zabalak, nahi duenarentzat.
Milalorea kategorian Aitor Zabala pasaitarra nagusitu zen, eta ezti argietan, Miren Lizasoain nafarra.