Goizuetan izanen dira Leitzako Jeiki abesbatzako kideak gaur arratsaldean. Doan eskainiko dute emanaldia, elizan, 19:30etan hasita. Urte osoa darama Leitzako abesbatzak Nafarroako hainbat herrietan zehar, 'Euskal soinu ondarearen ibilbideak' zikloaren baitan.
Gaurko kontzertuari dagokionez, euskal autoreen obrak izanen dira protagonista, kronologikoki ordenatuta: euskal kanta zaharrena izan daitekeenetik, gaur egunera arteko euskal konpositoreen obretaraino. 'A capella' abestuko dute batzuetan, eta pianoaren edo organoaren laguntzarekin besteetan.
Gainera, abesbatzatik nabarmendu dutenez, «ikuspuntu pedagogikoa» badu kontzertuak: «Azalpenari esker, ikuslegoak entzunen duena ulertzeko pautak jasoko ditu, eta historian zehar euskal musikan egon diren aldaketen berri izanen du». Zikloaren azkeneko kontzertua azaroaren 7an eginen dute, Etxalarren.