Txapelketa bikaina borobildu, eta ederra egin du Alize Sagardui goizuetarrak: Lau t'erdiko txapela jantzi du, finalean Marta Gomez ortuellarra 18-8 menderatuta. Torneo osoan zehar nagusitasun haundia erakutsi du Sagarduik, eta bere maila berretsi zuen igandean, Gernika-Lumoko Santanape frontoian jokatutako finalean: hasi eta buka gailendu zitzaion Gomezi.
Horrela, Emakume Master Cupeko kaiolako txapela gehitu die goizuetarrak, aurrez lortutako Binakako Txapelketari eta Nafarroako Irekiari. Erronka haundiagoei aurre egiteko moduan dela erakutsi du, eta halaxe izanen da: elite mailara saltoa emanen du laster hasiko den Binakako Txapelketan, oraindik 14 urte besterik ez izan arren.
Salaberriak eta Gaskuek, porrot mingarria Binakakoan
Gernikan bertan jokatu zuten Iker Salaberriak eta Andoni Gaskuek, finalen ondoren, B serieko Binakakoaren partidua. Porrot mingarria jaso zuten goizuetarrak eta ultzamarrak: 21-22 galdu zuten Jon Ander Peñaren eta Ruben Salaverriren kontra.