Andres Narbarte 'Xalto' eskola publikoko ikasle eta irakasleek Burdinolen Museoa bihurtu dute Goizuetako udaletxeko ganbara, proiektu erakargarri baten bidez. Aurkeztu bakarrik ez: atzo ere 'museoa' ikusteko aukera izan zen Feri Egunean, eta bihar, etzi eta abenduaren 13an ere ateak irekiko ditu, bertaratu eta ikusi nahi duen edozeinentzat.
Erakusketa berezia izanen da. Zikloka arlo ezberdinak landu dituzte. Honela, Haur hezkuntzakoek antzezlana egin zuten; LH1 eta 2koek burdinezko erramintak azaldu zituzten; LH3 eta 4 mailetakoek sektoreak ezagutarazi zituzten aurkezpenean; LH5 eta 6koek Goizuetako burdinolen funtzionamendua erakutsi zuten; eta azkenik, DBH1 eta 2ko ikasleek burdinolen maketa eta mehategiak jarri zituzten denek ikusi ditzaten.
Orain, lan guzti hori erakusgai dago aipatutako egunetan, udaletxeko ganbaran, arratsaldeko 17:00etatik aurrera. Orduan irekiko dituzte 'museo'ko ateak.
Legazpiko Mirandaola burdinolara egindako irteeratik sortu zen ideia
Xaltoko ikasleak Legazpiko Mirandaola burdinolara joan ziren urrian, «gure eskolako lehenengo irteera egitera. Horrekin eskola mailan burdinolen inguruan proiektu bat egitea pentsatu genuen, Goizuetan zegoen burdinola kopurua ikusita eta Antton Mari Mitxelenak lehendik egindako lana gogoan izanik».
Denen galdera hauxe izan zen: «Gai izango ote gara burdinolen museo bat egiteko? Ba, esan eta egin!». Xaltoko ikasleek erakutsi dute trebezia, eta atzo eman zuten argitara jendaurrean goraipatzekoa den lana. Aurkezpenean jende ugari hurbildu zen ganbarara eta ziklo bakoitzeko ikasleek proiektua zatika erakutsi zuten. Ikusi nahi duenak, badauka aukera oraindik.