Artisau eta nekazari artean agurtuko dute azaroa Goizuetan. Ohiturari eutsiz, gaur ospatuko dute Artisau eta Nekazari Feriaren 21. edizioa. Bisitari ugari espero dira herrian, eta askoren eguna dexente luzatuko da prestatutako egitarauarekin.
Goizeko 10:00etan jarriko dituzte postuak herrian. Inguruko ekoizleen produktuak ikusteko, dastatzeko eta erosteko aukera izango da ferian, prozesuaren azalpenak sortzaileen ahotik jaso bitartean. Horiekin batera, talogileak, erakusketak eta trikitilariak ibiliko dira Goizuetan barrena.
Eguerdian herri kirol saioa ikusteko aukera izango da. Malen Barrenetxea hernaniarra eta Nerea Arruti arituko dira aizkoran, eta Beñat Telleria harrijasotzen.
Goizeko lanak ondo amaituta, indarrak hartzeko baliatuko dute eguerdia. 14:30etan herri bazkari baten bueltan bilduko dira goizuetarrak, egunaren neurriko menuarekin: bertako babarrunak, betizu gisadoa eta postrea.
Bazkalostean, behin lotsa guztiak galduta, parrandarako trantsizioa egingo dute askok. 18:30etan Pasai Txarangaren erritmora kalejiran ibiliko dira; gaueko 23:00etan Rig3l goizuetarrak kontzertua eskainiko du gaztetxean, lagun batzuekin batera; eta 01:00etan DJ Zazek hartuko du lekukoa.
Antolatzaileek baserritar jantziak ateratzeko deia egin diete herritar guztiei.
Igandean, garbitzera
Larunbateko festaren ondoren, igandean herriko txoko guztiak auzolanean garbitzeko deialdia egin dute: «Denon artean errazagoa da!». k