Jubilatuak izango dira bihar Goizuetako protagonistak, euren neurriko egunean

Kronika - Erredakzioa 2025eko urriaren 17a

Jubilatuen Eguna ospatuko dute bihar, Umore Ona elkarteak antolatuta. Herriko jende asko elkartu ohi da prestatutako jarduera guztietan, eta helduenak izango dira protagonista. Goizeko 11:00etan hasiko dituzte ekintzak.

Neurri neurrira egindako festa egunaz gozatuko dute bihar Goizuetako jubilatuek. Urteroko legez, Jubilatuen Eguna antolatu du Umore Ona elkarteak, eta herritar ugari elkartuko dira prestatutako jarduera guztien bueltan.

Goizeko 11:00etan elizan elkartuko dira denak, igandeko Meza Nagusian. Ondoren, meza bukatu bezain pronto, pelota partiduak hasiko dira frontoian. Jende asko elkartu ohi da partiduetan, baita jubilatzeko asko falta zaienak ere.

Eguerdiko 14:00etan elkartera joango dira denak, bazkari eder batekin gozatzera. Bazkalostean, berriz, musika pixka bat eta Mus zein Truk txapelketak jokatuko dituzte bertan.

JUBILATUEN EGUNA, GOIZUETA

BIHAR

11:00 Meza Nagusia Goizuetako elizan.

Ondoren, pelota partiduak frontoian.

14:00 Bazkaria Umore Onan.

Ondoren, Mus eta Truk Txapelketak.

«Giro berezia sortzen da Jubilatuen Egunean, aspaldiko lagunak elkartzen direlako»

Umore Onako kideek antolatzen dute urtero Jubilatuen Eguna. Aitor Aizkorbe elkarteko lehendakariak berezitasun guztiak aletu ditu Kronikarekin.

Jubilatuen Eguna antolatu duzue beste urte batez. Egun garrantzitsua da Goizuetan.
Bai, hori da. Jarduerak nahiko markatuta daude aurreko urteetatik. Mezarekin hasten dugu eguna, era zaharrari jarraituz; gero pelota partiduak izaten dira, Goizuetan pelotak beti izaten duelako harrera ona; eta ondoren bazkaria egiten da. Bazkalostean musika pixka bat izaten dugu, eta Mus edo Truk Txapelketekin pasatzen dugu arratsaldea.

Nolako giroa sortzen da herrian?
Giro berezia dela esango nuke. Batez ere, askotan ikusten ez diren pertsonak elkartzen direlako. Baserrian bizi direnak edo adinagatik kalean gutxiago dabiltzanak aspaldiko lagunen ondora batzen dira, eta polita da hori gertatzen dela ikustea.

Jende asko biltzen da urtero.
Nik bi urte daramazkit Umore Onako lehendakaritzan, eta azkeneko edizioen 60 inguru elkartu gara soziedadean.

Gainontzean, urtean zehar mugimendua dute jubilatuek?
Pertsonaren arabera doa hori, baina baietz esango nuke; nik askorekin koinziditzen dut behintzat. Zahar Etxean ere elkartzen dira, eta bertan egiten dituzte jarduera dexente. Elkartean bertan askotariko jendea elkartzen da, baita jubilatu asko ere.

Jubilatuak protagonista diren arren, gainontzekoentzat ere festa eguna da biharkoa?
Orokorrean jubilatuek parte hartzen dute, baina giro berezia sortzen da herrian. Pelota partiduetan jende asko elkartzen da, eta bazkalaurreko poteoan ere ohi baino jende gehiago mugitzen da.

Azaroaren 1ean Gaztetxean Euna duzue Goizuetan. Badago mugimendua herrian.

Aurten lehenengo aldiz antolatuko da Gaztetxean Euna, bultzada emateko asmoz. Ea zenbat pertsona elkartzen garen. Goizuetan mugimendu haundia dago orokorrean.

Eta mugimendu horretan zerikusi haundia du elkarteak, ezta?
Bai. Puntu asko mugitzen dira bertatik, eta urte bukaera potentea izaten da. Jubilatuen Eguna, Atalen Eguna, Feriak... Bestelako jarduera asko ere egiten ditugu: Bazkideen bazkaria, Mus Txapelketa... Elkarteko kideok aldiro gaude herrian antolatzen diren jardueretan laguntzeko prest.

Gizartea Goizueta

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!