Ibilbide aldaketak, aukera eman zien Goizutraileko partehartzaileei txoko berriak ezagutzeko, Loitzate, Arainburu eta Beltzuntza inguruetan. Goizuetarrentzat ez zen horrenbeste sorpresarik izan, ezta sekreturik eta tranparik ere, etxeko mendi lasterketan.
Hala gertatuko zitzaion Hodei Lujanbiori ere: denboraldi osoan zehar erakutsi duen sasoiari ibilbidearen ezagutza gehituta, bigarrenez lortu zuen garaipena Goizutrailen ibilbide luzean, 25 kilometroak 2:06:54 denboran osatuta. Emakumezkoetan, berriz, Ane Eltzaurdia beratarra (2:41:06) nagusitu zen, apenas 17 segunduren tartearekin, Maria Ordoñez iruindarraren aurretik.
10 kilometroko proban, Ander De Miguel iruindarra nagusitu zen gizonezkoetan, ia bi minuturen aldearekin bera ere; eta oso estua izan zen emakumezkoena berriro. Guratz Azpiroz uitziarrak 23 segundugatik menderatu zuen Ane Petrirena sunbillarra.
Guztira, 16 goizuetarrek hartu zuten parte etxeko lasterketan: zazpik osatu zuten ibilbide luzea, zortzik laburra, eta herritar batek bikotekakoa egin zuen. Urumea bailarako korrikalariak, berriz, 31 izan ziren denera; gainerako 15ak hernaniarrak.