Parajea zuri-zuri zegoela osatu zuten larunbatean Trabuko Bidearen bigarren etapa, Leitzatik Ihabenera. Arriskutsua izateko ospea daukan 'Gaizkileen muga' gainditu zuten goizuetarrek.
Bi etapa osatu dituzte jada Arainburu Mendi Taldeko kideen eskutik, eta guztira 90 lagunek hartu dute parte ibilaldietan. Lehenengo etapan Leitzalarreko mendietako baso eta larreak pasa, eta Leitzako sakanera jaitsi ziren. Bigarren etapan, berriz, Erasoteko bailaran barna, Ireber mendiaren magalean dagoen Oringo iturrira igo ziren, eta Beruete eta Jauntsaratseko goi-zelaietara jaitsi ondoren, Ihabenen bukatu zuten ibilbidea.
Bide erdia egin eta gailurra gainditu izana ospatu zuten, Ihabengo elkartekoek eskainitako ongietorri beroarekin eta hamaiketakoarekin. Giro ederrean, 'Goizuetan bada gizon bat' kantatuz bukatu zuten etapa.
Martxoaren 29an, hirugarren etapa
Orain, gelditzen diren beste bi etapek eramango dituzte partehartzaileak Basaburuako lurretatik Imotz eta Iruñerrikoetara. Hirugarren etapa martxoaren 29an egingo dute, Ihabenetik Oteizarako bidea burutzeko. Sei orduko ibilbidea izango da, eta izenematea zabalik dago martxoaren 24a bitarte. Apuntatzeko 669 080 161 telefono zenbakira deitu behar da. Malda 'gaiztorik' gabe, herri politez eta bide lasaiaz disfrutatzeko aukera ederra eskainiko du datorren etapak ere.
