Evaren Alabak antzerki taldeak 'Ring' antzezlana eskainiko du gaur, Goizuetan. 18:30etan hasiko da saioa, udaletxeko ganbaran. Elena Arambarri da zuzendaria eta antzezleetako bat, eta taula gainean alboan izanen ditu Nieves Peña, Iratxe Ramirez eta Sonia Sanz.
Egiten dituzten antzezlanak «bizitza bezain errealak eta gordinak» direla diote taldeko kideek. Ikusleekin konplizitatea lortzea da beraien helburuetako bat, eta saio guztiak desberdinak eta bakarrak izaten dira. Besteak beste, feminismoaz, berdintasunaz, egunerokoaz, tabuez edota gezurrez aritzen dira, beti ere «errespetuz, ironiaz eta umorez».
Umorezko antzezlan kritikoa da gaur eskainiko dutena. Zenbait arazo ditu ardatz antzezlanak: diskurtso feministaren eta gure jokabidearen artean ditugun kontraesanak; emakumeen gorputzaren gaineko zapalkuntza, zahartzaroa, loditasuna edo inperfekzioa baztertzeagatik; eta portaera matxistak eta bortitzak aldatzeko indarkeria erabili behar den ala ez.