Larunbatean ospatuko da Haur, Guraso eta Eskolen arteko topaketa, Goizuetan. Ekimena 2000. urtean abiatu bazen ere, eta 2020 eta 2021ean pandemiagatik ospatu ez bazen ere, bizi bizi jarraitzen du, urtero zitari hutsik egin gabe.
Hasierako helburuei sendo eusten diete antolatzaileek. Besteak beste, Leitza, Areso, Goizueta, Arano eta Ezkurrako haur, guraso eta irakasleak jai giroan elkartzea, herrien arteko elkar ezagutza haunditzea, eta berdintasuna eta errespetuan oinarritutako harremanak lantzea.
Eskualdeko haur eta gazteek elkar ezagutzeko parada izango dute larunbatean, herrien arteko elkar ezagutza eta hartu emana haundituz, eta hau antolatzen ibili dira: eskualdeko (Leitza, Goizueta eta Areso) guraso elkarteak, eskolak eta Leitzako, Goizuetako, Aresoko eta Aranoko Gizarte Zerbitzuak, elkarlanean. Hiru herrietan ospatzen den arren, Aranoko eta Ezkurrako familiek ere hartzen dute parte.
Larunbaterako autobus irteerak ere zehaztu dituzte: Aresoko Plaza Zaharretik 10:00etan irtengo da, eta Leitzatik berriz, 10:15tan Herri Aretotik. Bueltatzeko autobusa, arratsaldeko 19:30 irtengo da Goizuetako plazatik.
Topaketarako abesti bat sortu dute, larunbateko lehen hitzorduan kantatuko dutena. Bestalde, jokoak egingo dituzte egun osoan zehar, eta bazkaria Pilota plazan egingo da. Arratsaldeko merienda eta dantzaldiarekin amaituko da festa.
EGITARAUA
GOIZUETA
11:00 Ongi etorria. Topaketako kanta eta dantza. Herrien besarkada.
11:30 Jokuak herrian barrena
14:00 Bazkaria pilota Plazan.
16:00 Irumaita Txarangarekin 'Herri ttikitan ikasi eta bizi!'.
16:30 Jokuak.
18:00 Merienda eta dantzaldia.