Karmen Egunaren bezpera da gaur, ospakizun eguna Goizuetan. Eta urteroko ohiturari hutsik ez egiteko, dena prest dauka Umore Ona elkarteak, Udalaren eta Ikastola Batzordearen laguntzarekin. Gaueko 21:00etan jarri dute zita, plazan, herri afaria egiteko. Norberak eraman beharko du afaria etxetik, familian edo lagunartean antolatuta; baina bertan topatuko dute beharrezko materiala, Umore Onak jarrita: mahaiak, aulkiak, platerak, kubiertoak, edalontziak eta serbilletak. Eta sagardoa eta ardoa ere, elkartearen kontura!
Eguraldiak traba egiten ez badu behintzat, giro ederrean afalduko dute plazan, adin guztietako herritarrek. Eguraldi txarra eginez gero, elkartean eginen dute afaria.
Eta ondoren, hutsik egin gabe, Karmen bezperako ohiko sua piztuko dute plazan, garai batean Goizuetako baserri eta etxeen atarietan egiten zuten bezalaxe, arbiaren zuztarrak errez.