Korrikarako hilabete «exkax» falta dela gogoratu du Goizuetako Korrika batzordeak. Hala ere, Korrika kulturalaren egitaraua aurkeztu aurretik, goizuetarrak zoriondu dituzte erositako kilometro kopuruagatik: «guztira 29 kilometro erosi ditugu goizuetarren eta aranoarren artean, eta ondorioz, 800 metroko ibilbidea gauzatuko dugu. Arrunt 'Harro' gaude zuetaz!». Antolatzaileek dagoeneko egina dute kilometro banaketa, eta ondorengo estekan dago ikusgai: https://acesse.one/rL3oG.
Horrez gain, motorrak berotzen hasteko asmoz, Goizuetan ere Korrika kulturala antolatu dute martxorako. Ekintza mordoa antolatu dituzte martxoaren 2tik 19ra, eta aurrenengo hitzordua izanen dute goizuetar txikiek. Izan ere, martxoaren 2an, Zapotxin pailazoaren bisita izanen dute, arratsaldeko 17:30etan Goizuetako Ganbaran. Hurrengo egunean, 'Bizkarsoro' filma proiektatuko dute Ganbaran, arratsaldeko 18:00etan hasita. Hilaren 9an, hitzordu garrantzitsua dute goizuetarrek eta aranoarrek, izan ere, Aranon 'Korrika festa' antolatu dute; tartean izanen dira, bigarren eskuko azoka, kantu bazkaria eta argazki subasta. Itzalekin jolasean aritzeko parada izanen dute herritarrek hilaren 10ean, 'Enperadorearen kondaira' itzal antzerkiarekin, Ganbaran. Eta bertsoek ezin izan dute hutsik egin Korrika kulturaleko egitarauan. Horrenbestez, kantuan izanen dira Unai eta Eñaut Agirre anaiak, Imanol Kamioren musikaz lagunduta. Martxoaren 19an, berriz, Korrika kulturalari amaiera emanen zaio Korrikarekin bat eginez, arratsaldeko 18:30ak inguruan.
|
KORRIKA KULTURALA GOIZUETA MARTXOAK 2 17:30 Zapotxin, Ganbaran MARTXOAK 3 18:00 'Bizkarsoro filma', Ganbaran MARTXOAK 9 Korrika festa Aranon 12:00 Bigarren eskuko azoka 14:00 Kantu bazkaria 18:00 Argazki subasta MARTXOAK 10 17:00 'Enperadorearen kondaira', Ganbaran MARTXOAK 15 21:00 Bertso zaharren afaria: Imanol Kamio; Unai eta Eñaut Agirre. Umore Ona elkartean. MARTXOAK 19 18:30ak aldera, Korrikara |