Kultur ekintzaz beteta dator, beste behin, Goizuetako udazkena. Makina bat hitzordu jarri dituzte azarorako eta abendurako, eta gaur bertan izanen da estreinakoa: '20.000 especies de abejas' filma jarriko dute udaletxeko ganbaran, arratsaldeko 17:30etan. Entzute haundia eta hainbat sari eskuratu ditu filmak, eta Estibaliz Urresola da zuzendaria, Ereñotzun bizi den zinegile laudiotarra.
Kultur agendak datorren ostiralean izanen du segida, azaroaren 10ean: 'Bertso-pintxo-potea' eginen dute gaztetxean, iluntzeko 19:00etan hasita, Eli Pagola, Maddi Aiestaran eta Aissa Intxausti bertsolariekin.