Hirugarrenez irabazi du Hodei Lujanbio goizuetarrak, Urdazubiko Kontrabandisten Lasterketaren sailkapen nagusia. 2019an eta 2021ean egin bezalaxe, bi probetan aritu zen Lujanbio, joan den asteburuan: Gaueko Lanak (9,5 kilometro) ostiral gauean, eta Maratoi Erdia (22 kilometro) larunbatean.
Bigarren izan zen ostiralean (52:41), Jokin Arretxearen atzetik (50:06); eta hirugarren larunbatean (1:57:02), Iñigo Uribeetxebarriarekin (1:49:47) eta Javier Arangurenekin (1:55:09) podiuma konpartituta. Hori horrela, bi probak osatu zituztenen artean, azkarrena izan zen goizuetarra, eta berak eskuratu zuen sailkapen nagusia. Guztira 2:49:43 denbora pilatuta, ia 20 minutuko aldearekin nagusitu zen, Michel Guilcouren aurretik.