Interneteko banda zabalarekin lotutako lanak eta instalazioak egin dituzte Goizuetan, zuntz optikoa herrian zabaltzeko. Hori horrela, dagoeneko hedatuta dago zuntz optikoa herrigunean, eta horretarako aukera «bermatuta» daukate bertan bizi direnek, Udalak aditzera eman duenez.
Orain, beste pauso bat eman nahi dute bide horretan, eta baserrietara helarazi nahi dute banda zabala. Horretarako aukerak lantzen aritu dira, eta azaldu dutenez, irrati-frekuentzia bidezko teknologia erabiltzea da irtenbideetako bat. «Horren bitartez, baserrietan eskaini daitezke internet abiadura haundiagoan, telefonoa, eta telebista ikusteko aukera desberdinak», jakinarazi du Udalak.
SISNET enpresako ordezkari bat batzarrean, azalpenak emateko
Interneta baserrietara zabaltzeko aukerak aztertuta, zerbitzu hori eskaintzen duten enpresa batzuekin harremanetan izan da Udala; eta orain, batzar irekia antolatu dute, «gai honi buruz zabalago hitz egiteko, eta herritarrek izan ditzaketen zalantzak argitzeko». Gaur izango da batzarra, arratsaldeko 19:00etan, udaletxeko ganbaran. Udal ordezkariekin batera, SISNET enpresako ordezkari bat ere izango da bertan, beharrezko azalpenak emateko.
Bertaratzeko gonbitea luzatu die Goizuetako Udalak, herriko baserritar guztiei.