Herriko jaiei data finkoak jartzea erabaki ondoren, astelehenetik ostiralera tokatu dira aurtengo Amabirjin Jaiak Goizuetan; baina astebururik ez ikutzea ez da izan kalterako: sekulako giroa piztu da herrian, egunero.
Atzo amaitu ziren Fiestak, oso egun bereziarekin: bukaera txuri-berdea eman zioten (tira, ardoaren gorritik ere izan zuen, noski...) aste intentsoari, Umore Ona Peñaren eguna ospatuta. Goizean egin zuten irteera txarangarekin, eta esku pelotariei protagonismo pixka bat utzi ondoren, sekulako giroarekin egin zuten bazkaria. Arratsaldean egin zuten beste kale buelta bat, zezenak tarteko. Bost egunez bizitakoak gogora ekartzeko, argazki albumak ikusgai daude kronika.eus webgunean.
